Sápmi |

Walt Disney Animations Studios hárjehallin ohce 21 olbmo – Ohcamušat bohte miehtá Sámi

Sámiráđi kulturossodaga hoavda lea ilus, go nu máŋgasat ohce hárjehallin.

Walt Disney Studios
Govva: AFP

Boahtte geasi beassá sápmelaš media- dahje filbmasuorggi nuorra vásihit stuora máilmmis bargama, go beassá vuolgit Walt Disney Animations Studioi hárjehallin. Ohcanáigi hárjehallamii nogai otne vuossáriđit.

Hárjehallin ohce oktiibuot 21 olbmo. Ohcamušat bohte Norggas, Suomas ja Ruoŧas.

Walt Disney Studios vállje hárjehalli ohcciid gaskkas. Sámiráđđi ja buot golmma riikka Sámedikkit juolludit hárjehallái 10 000 dollára mátkestipeandda.

Sámiráđi kulturossodaga hoavda Christina Hætta illuda, go nu máŋgasat ohce hárjehallibáikki.

– Mii sávvat mávssolaš ja buori vásáhusa oahpahallái, gii beassá vuolgit. Ohcamušaid bokte lea movttiidahtti oaidnit, man olu iešguđet gelbbolašvuohta filbmasuorggis lea nuorain Sámis.

Christina Hætta
Christina Hætta mielde Sámi filbmamáilbmi ávkašuvvá dán hárjehallamis. Govva: Sámiráđđi

Animašuvnnaid dubben lea šaddan dehálaš oassin sápmelaš filbmamáilmmi. Maŋimuš jagi áiggi leat Jikŋon 2 -filmma lassin dubben maiddái jáhpanlaš Chihiro ilmmiid gaskkas (Spirited Away) -animašuvnna, mii lea vuoittán jagi 2003 buoremus animašuvnna Oscar-bálkkašumi. Dál leat dubbemin Mumenvággi-prográmma. Dál leat maid plánen dubbenstudioid huksema earret eará Guovdageidnui.

Walt Disney Animation Studios hárjehallama geažil maiddái Sámi filbmaindustriija beassá ávkkástallat animašuvdnabarggu máhtus ja vásáhusas.

– Mátkestipeandda bokte oahpahalli maiddái lohpida máhcahit dan, maid son oahppa ja vásiha, ruovttoluotta Sápmái ja dasa mii maid illudit, lohká Hætta.

Fágalaš lonohallan ja gelbbolašvuođa ovddideapmi lea oassi Walt Disney Animation Studios, Sámedikkiid ja Sámiráđi gaskasaš soahpamušas. Soahpamuša dahke Jikŋon 2 -filmma ovttasbarggu oktavuođas.

Varrasamosat: Sápmi

Váldoođđasat

Varrasamosat

Muualla Yle.fi:ssä