Sápmi |

Wikipediija bokte maid oahppá sámegiela

Wikipediija bokte lea maid vejolaš oahppat čállit sámegillii. Ná lea dahkan 10-jahkásaš Ali Ylikoski, guhte lea almmuhan diimmá čavčča rájes juo measta duhát Wikipediija-artihkkala sámegillii.

Ali Ylikoski čállimin
10-jahkásaš Ali Ylikoski čállimin Wikipediija-artihkkala. Áhčči čuovvu bálddas mo čállin ovdána. Govva: NRK Sápmi

Ylikoski bearaš fárrii Suoma bealde Guovdageidnui diibmá ja dan rájes gánda lea oahpahallagoahtán sámegiela. Ylikoski muitala, ahte son háliida ovdánahttit giela ja danin de čállá Wikipediijai.

- Mu mielas lea dehalaš čállit Wikipediijai sámegielat artihkkaliid, danin go dan bokte sáhttá ovddidit giela, erenomážit girjegiela. Dat lea maiddái somá, lohká Ylikoski.

Gándda áhčči, gielladutki Jussi Ylikoski lea duđavaš, muhto maiddái ipmašis, go gánda lea oahppan giela nu jođánit.

- Lean gal imaštallan, ahte mo gánda nie jođánit lea oahppan. Muhto dát Wikipediijai čállin orru leamen buorre metoda oahppat giela, danhan geavahit maid skuvllain, muitala Ylikoski.

Dássážii Wikipediijas gávdnojit lagabui 4 700 artihkkala sámegillii ja eaŋgalasgillii badjelaš njeallje miljovnna. Ali Ylikoski jáhkká, ahte sámegillii gal maid lea vejolaš juksat dákkár logu.

- Jáhkán, ahte dat lea vejolaš dalle go soames hutká dakkár mášiinna, mii lea johtilot jorgalit gielas gillii go olmmoš, árvala Ylikoski.

Yle Sápmi / Ailu Valle & NRK Sápmi / Johan Ante Utsi

Varrasamosat: Sápmi

Váldoođđasat

Varrasamosat

Muualla Yle.fi:ssä