Sápmi |

Wimme maid boahtimin Ellos Deatnu! -doarjjakonseartii – "Ii ábut badjelgeahččat Sámi olbmuid"

Wimme lea okta dain, geat loaiddastit Ellos Deatnu! -joavku doarjjakonsearttas Busteldearpmis 25.7. Son oaivvilda konsearta leat ovttalágán fámu čájeheapmi.

Jietna: Wimme Ijahis ijas 2015
Jietna

Vel eat dieđe, makkár konseartta Wimme Busteldearpmis doarjjakonsearttas oaidnit. Son muitala, ahte ii láve bearehaga ovddalgihtii smiehttat maid dahká.

– Go mun oainnán makkár sadji, makkár olbmot ja makkár dovdu, dat addá munnje dan movtta ja nuohtaid. Mun oainnán dasto go mun ollen dohko ja bisánan ja geahčan. Diet gal lei mus vehá jurdda, jos mun gitára vehá geahččalan, muhto oaidná dal. Soameslágán lávlaga vel ráhkadit sierralágána dohko, lea dás vel áigi juoidá hutkat.

"Sáhtte rohttestit ovttas"

Suomas dovddus rap-artista Paleface muitalii Yle Sámi jearahallamis 12.7., ahte sudnos leamašan Wimmein ovdal muhtinlágán ovttasbargu ja dat kánske joatkašuvvá.

– Gal mun lean leamaš mielde Paleface dan Shangri-La cd:s ledjen mielde, veahkehin vehá Paleface. Ja galhan moai sáhtte juoidá rohttestit ovttas doppe Ohcejogasnai, go dákkár dilli šaddá, dadjá Wimme.

"Bággu vehá loktet jiena"

Wimme oaidná Ohcejoga moratorio buorre áššin. Son oaivvilda maiddái, ahte báikkálaš olbmuid eallinvásáhusat ja dieđut galggaše váldot eanet vuhtii mearrádusaid dahkamis.

– Dathan lea bággu juoidá dahkat, go lullin dat mearridit davviguovllu áššiin, eaige váldde ovddalgihtii áššiin čielgasa, eaige dutkka albma ládje daid váikkuhusaid go dahket mearrádusaid. Dat lea bággu vehá loktet jiena ja njuiket bajás, ii ábut badjelgeahččat Sámi olbmuid ja dahkat mo soaitá.

Wimme oaivvilda, ahte konsearta lea ovttalágán fámu čájeheapmi, ja dat buktá gullosii ja oidnosii.

– Soaitá dát mearrideaddjit vehá álget rahpat beljiideaset buorebut ja ipmirdit geahččat vehá guhkkelebbui, eaige daga nu oanehisjierpmát mearrádusaid maid dál leat dahkan dan guolástansoahpamušas. Dat lea buorre koansta ja dan ferte čađahit.

Ellos Deatnu! -joavku doarjjakonseartta ordnejuvvo Ohcejoga Busteldearpmis maŋŋebárgga 25.7. dmu 17.00.

Wimme lei mielde Dearvva-sáddagis 12.7.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä