Sápmi

Yle Areenas almmustuvvagoahtán lasi mánáidprográmmat sámegillii

Saammâl já meeci kunâgâs.
Govva: Unna Junná / Yle

Yle lasiha sámegielat mánáidprográmmaid Yle Areenai koronavirusdili geažil. Prográmmat leat golmma sámegillii.

Yle Areenas almmustuvvet dál lasi sámegielat mánáidsisdoalut. Prográmmat gávdnojit dán siiddus. Dárkkuhus lea lasihit mánáidsisdoaluid namalassii danin, go aiddo dál daidda lea stuorra dárbu.

Yle Sámi mánáidprográmmaid buvttadeaddji Heli Huovinen muitala, ahte son lea dál čuvvon ságastallamiid ovdamearkka dihte sosiála medias ja lea fuomášan, man váttis dilli muhtin váhnemiin ja mánáin soaitá leat.

– Mánát eai vealttekeahttá gula sámegiela gostege, jus ii medias, dahje jus ii gávdno materiála. Dieđusge maiddái sidjiide dat lea dehálaš, geat besset ruovttusge sámástit, čilge Huovinen.

– Lean vuoruhan dán dál min dehálamos bargun dálá dilis, Huovinen joatká.

Golmma sámegillii

Yle Areenai bohtet earret eará Unna Junná animašuvdnaráiddut, main vuosttamužžan Sä´ppli ja Saammâl já meeci kunâgâs. Dat leat davvisáme-, anáraš- ja nuortalašgillii, eanemustá goittotge anáraš- ja nuortalašgillii.

Sä'ppli animaatio.
Govva: Unna Junná / Yle

Huovinen muittuha, ahte prográmmaid bidjan Yle Areenai ii leat nu álkes proseassa, go sáhtášii jurddašit. Danin dainna ferte veaháš rahčat.

Čuovvovaš prográmmaide olbmot sáhttet váikkuhit.

– Mun válddán evttohusaid vuostá, ahte maid olbmot háliidivčče oaidnit. Dat prográmmat dieđusge fertejit leat dakkárat, maid mii leat ovdal bargan, mat leat ovdal juo boahtán Unna Junnás, muitala Huovinen.

Evttohusaid sáhttá sáddet Huovinenii čujuhussii heli.huovinen@yle.fi.

Yle Areenas gávdno maid mánáide radioprográmma Binna Bánna ja dat boahtá Yle Sámi radiokanálas juohke bearjadaga dii. 10.00–10.30, nuppádassii vuossárgga dii. 14.00–14.30. Binna Bánna lea maid golmma sámegillii.

Varrasamosat

Muualla Yle.fi:ssä