Sápmi |

Yle dubbe Mumenleahki-ráiddus oasi maiddái anáraš- ja nuortalašgillii – prográmmat oidnojit neahta lassin TV:s

Sámediggi ja Mumenleahki-ráiddu buvttadanfitnodat skuvlejit sámegielat jietnaneavttáriid boahtte jagi álggus.

Muumilaakson väki uudessa animaatiosarjassa.
Govva: Moomin Characters & Gutsy Animations

Oassi Mumenleahki-ráiddus dubbejuvvo dattetge maiddái anáraš- ja nuortalašgillii. Skábmamánus Yle almmuhii, ahte ráidu dubbejuvvo dušše davvisámegillii.

Yle Draama, Mumenleahki-ráiddu buvttadanfitnodat Gutsy Animations ja Sámediggi leat maŋimuš vahkuid áigge ráđđádallan ráiddu dubbemis ja loahppaboađus lea, ahte ráidu dubbejuvvo buot Suomas hállojuvvon sámegielaide juoga nu veardde.

Ulbmilin lea, ahte Mumenleahki-ráiddu vuosttaš buvttadanáigodat dubbejuvvo davvisámegillii ja nuppi buvttadanáigodaga osiin bealli dubbejuvvo anárašgillii ja nubbi bealliges nuortalašgillii.

Vuosttaš buvttadanáigodat, nappo davvisámegielat prográmmat, oidnogohtet Yle TV2:žis 13.4. rájes. Mumenat sáddejuvvojit Unna Junná sáddenáiggis diibmu 8.35. Sámegielat Mumenleahki-ráidu lea oaidnimis maiddái Yle Areenas.

Nubbi buvttadanáigodat, nappo anáraš- ja nuortalašgielat prográmmat, oidnojit TV:s čakčat. Sámegielat Mumenleahki-ráidu ii tekstejuvvo suomagillii.

Yle Sámi hoavda Maiju Saijets lea earenomáš movttet das, ahte mumenat válbmanit juo giđa áigge ja dat oidnogohtet maiddái TV:s.

– Álgoálggus lei sáhka dušše Yle Areenas. Dál dat juksá eanet olbmuid, go ráidu oidno sihke TV:s ja Yle Areenas. Dan sáhttá geahččat dalle, go mánáide lea buot buoremus.

Muumipeikko ja niiskuneiti istuvat vaaleanpunaisen pilven päällä yläilmoissa.
Govva: Moomin Characters & Gutsy Animations

Dubbenbargobájit jo ođđajagimánus

Ođđa Mumenleahki-ráiddu dubbema golmma sámegillii evttohii álgoálggos Sámediggi.

Sámedikki gielladorvočálli Anne Kirste Aikio lea hui ilus das, ahte dubbenášši čoavdašuvai dál dan guvlui, go Sámediggi lei ieš árvalan.

– Dál buot gielat dubbejuvvojit mannu veardde. Sámedikki ulbmilin lea goit doarjut dan, ahte buot oasit boađáše loahpaloahpas buot sámegielaide, dadjá Aikio.

Skábmamánus Yle ákkastalai mearrádusas dubbet dušše davvisámegillii dainna, ahte anáraš- ja nuortalašgillii eai gávdno doarvái jietnaneavttárat.

Dál Sámediggi leage evttohan Mumenleahki-ráiddu buvttadanfitnodahkii oktasaš bargobájiid lágideami jo ođđajagimánu áigge. Bargobájiin galget oahpahit sihke jietna- ja dubbenneaktima ja vuodjut maiddái dubbenjorgaleapmái.

Anne Kirste Aikio muitala, ahte Sámediggi háliida veahkehit ja doarjut dákkár gelbbolašvuođa huksemis.

– Dasa lea dárbu namalassii danin, go daddjojuvvui, ahte eai gávdno ámmátneavttárat nuortalaš- ja anárašgillii. Mii eat hálit, ahte dát bargu bisána dasa. Dan dihte mii leat dál soahpan doaibmavugiid das, mo mii ovttasbarggus sáhttit čoavdit buot giellaveršuvnnaid.

Sámediggi dieđiha dubbenbargobájiid birra maŋŋelaš.

Anne Kirste Aikio
Sámedikki ulbmilin lea doarjut dan, ahte Mumenleahki-ráidu dubbejuvvošii loahpaloahpas buot sámegielaide, dadjá gielladorvočálli Anne Kirste Aikio. Govva: Anneli Lappalainen / Yle

Jietnaneavttárat galget máhttit lávlut

Yle čájehii árat dán jagi Mumenleahki-animašuvnna vuosttaš buvttadanáigodaga suomagillii. Ráidu lea máksán badjel 20 miljovnna euro, ja dat leage historjjá stuorámus ja divraseamos TV-buvttadeapmi Suomas.

Mumenleahki-prográmma buvttadeamis vástidit suopmelaš Gutsy Animations -fitnodat ja prográmma dáiddalaš bagadalli Marika Makaroff.

Sámegielat Mumenleahki-ráiddu galget bagadallat Gutsy Animations -buvttadafitnodat, Sámediggi ja BTI-jorgalanfitnodat ovttas. Gutsy Animations -fitnodaga ovddidanhoavda Reetta Ranta muitala, ahte oassebealit leat ráđđádallan olu das, mii lea dán muttus vejolaš ja buoremus čoavddus sámeservodaga dáfus.

– Ráiddu osiid dubben lea dál juogaduvvon iešguđet sámegielaide. Lea vejolaš, ahte boahtteáiggis olles Mumenleahki-ráidu dubbejuvvo ollásit buot golmma sámegillii. Dál dasa goit eai leat resurssat ruđa ja áiggi dáfus.

Go lea sáhka hui unna giellajoavkkuin, de stuorámus hástalus lea gávdnat jorgaleaddjiid ja jietnaneavttáriid. Ranta vuordáge buvttadanfitnodaga ja Sámedikki oktasaš bargobájiid.

– Animašuvdnaráiddu dubbenjorgalusas ferte váldit vuhtii nu olu iešguđetlágan áššiid, dego stávema ja njálbmelihkastagaid, čilge Reetta Ranta.

Mumenleahki-ráiddus leat goappaš buvttadanáigodagain moaddelogi sierra jietnarolla. Ranta jáhkká, ahte anáraš- ja nuortalašgielat dubbenbarggus soitet jietnaneavttárat šaddat neavttašit máŋgga rollas. Neaktima lassin jietnaneavttárat galggaše máhttit maiddái lávlut.

– Lean ipmirdan, ahte sámekultuvrras lávlundáidu johtá eatnimielkkis. Dat ii galggašii leat hástalus, árvala Reetta Ranta.

Varrasamosat: Sápmi

Váldoođđasat

Varrasamosat

Muualla Yle.fi:ssä