Sápmi |

Yle jearai gielddain, galggašiigo lagašoahpahussii máhccat miessemánus – Sámegielddain Eanodagas sávvet gáiddusoahpahusa joatkašuvvat loahppagiđa

Suomas ráđđehus lea čoahkkanan gieđahallat earet eará skuvllaid rahpama. Norggas rahpet mánáidskuvllaid boahtte vahkus.

Tyhjä luokkahuone Helsingin Viikin normaalikoulussa.
Skuvllat giddejedje uvssaidis njukčamánus. Govva: Ronnie Holmberg / Yle

Ráđđehusas vuordit hohpolaš mearrádusaid lagašoahpahussii sirdáseamis skuvllain. Ráđđehus gieđahallá ráddjehusaid váikkuhusaid virusa leavvamii odne gaskavahku.

Oahpahussuorggi ámmátorganisašuvdna OAJ ságadoalli Olli Luukkainen vuostálastá skuvllaid rahpama. Luukkainen juoba árvala, ahte lagašoahpahussii sirdin dagaha proteasttaid nu fuolaheaddjiid go oahpaheaddjiidge gaskkas.

– 95 proseantta dain oktavuođaváldimiin maid lean ožžon, lea ahte skuvllaid ii galgga maŋge namas rahpat. Ákkastallan buohkain lea namalassii dát dearvvašvuohta.

Luukkainen ii jáhke skuvllaid rahpama váikkuhit oahpahusa mihttomeriid ollašuhttimii. Oahpaheaddjit galget miessemánu beallemuttu rádjái dahkat oahppiid árvvoštallamiid, vai duođaštusaid gerget čállit.

Olli Luukkainen
Oahpahussuorggi ámmátorganisašuvdna OAJ ságadoalli Olli Luukkainen vuostálastá skuvllaid rahpama. Govva: Mikko Koski / Yle

Eanodagas sávvet gáiddusoahpahusa joatkašuvvama

Yle jearai gielddaid ovddasteaddjiin, galggašiigo lagašoahpahussii máhccat miessemánu beallemuttus. Máŋggat vástideaddjit sávve gáiddusoahpahusa joatkašuvvat lohkanbaji loahpa rádjái, muhto máŋggat jáhkke stáhtaválddi bastit buorebut mearridit dilis.

Sámegielddain Eanodaga gieldda hálddahuslaš rektor Riitta Peltovuoma mielas gáiddusoahpahusa gánnáhivččii joatkit loahppagiđa. Jos ráđđehus goittotge mearrida joatkit lagašoahpahusa, leat gielddas dasa gergosat johtilit.

– Jos ráđđehus mearrida áššis mánotbaji doajáldagas ja skuvllat rahpasit 14.5, de mii leat dalle gergosat. Jos mearrádus boahtá fáhkkestaga, mis manná moadde beaivvi, eanaš doarjjabálvalusaid, dego sáhtuid ja borademiid ordnemii.

Anára gieldda čuvgehushoavda Ilkka Korhonen ii váldde beali dasa, gánnáhago gáiddusoahpahusa joatkit giđa lohppii. Anára gielddas oahpahus ordnejuvvo dan mielde, makkár rávvagat ráđđehusas bohtet.

– Stáhtaváldi mearrida áššis, dat gullá sin bargguide. Stáhtaváldi maiddái vihke iešguđege doaimma ávkkiid ja hehttehusaid.

Yle Sápmi ii fáhten Ohcejoga ja Soađegili gieldda vástidit gažadeapmái.

Suoma ráđđehusa dálá linnjema mielde gáiddusoahpahus joatkašuvvá 13. miessemánu rádjái.

Norggas rahpet mánáidskuvllaid boahtte vahkus

Norgga ráđđehus lea mearridan boahtte vahkus rahpat mánáidskuvllaid, namalassii vuosttas luohkás njealját luohkáid oahppiide.

Guovdageainnu mánáidskuvlla rektor Ella Eira muitala NRK Sápmái, ahte hástalussan šaddet smávva oahpahuslanjat.

– Latnjii galget 15 oahppi mehtera gaskkain, čájeha Eira unna luohkkálanjas.

Norgga ráđđehus lea sádden skuvllaide bagadeami das, mo sii sáhttet oadjebasvuođain doaibmagoahtit vaikko koronavirus ain leavvá máilmmis. Rávvagat gusket ovdamearkka dihte gieđaid bassama ja oahpahusa addima ja vuoruheami olgun. Vuosttas skuvlabeaivvi mánáide oahpahit ođđa njuolggadusaid.

– Mis lea čáppa luondu, miihan sáhttit olu olgooahpahusa geavahit. Gávpotmánáin eambbo hástalus, muitala Ella Eira NRK Sápmái.

Varrasamosat: Sápmi

Váldoođđasat

Varrasamosat

Muualla Yle.fi:ssä