Sää´mjânnam

Yle nuõrttsääʹmǩiõllsaž tuåimteei Sara Wesslin lij eʹtǩǩuum eeʹjj 2020 nuõrr tuåimteeʹjen

Sara Wesslin
Sara Wesslin lij reâuggam Yle Sääʹm tuåimteeʹjen eeʹjjest 2013 vueʹljeeʹl. Govva: Päivi Mäkelä

One Young World -fooruum Eeʹjj tuåimteei -ciist jueʹjjet kålggmannust München-gåårdest.

Yle Sääʹm nuõrttsääʹmǩiõllsaž tuåimteei Sara Wesslin lij eʹtǩǩuum Eeʹjj tuåimteei -ciist vuäǯǯjen. Ciist juâkk maaiʹlmveiddsõs nuõrr jååʹđteeʹji fooruum One Young World. Fooruum mieʹrren lij õhtteed maaiʹlm jäänmõsân vaaikteei nuõrid raajjâd pueʹrab maaiʹlm da oouʹdeed vasttõõzzlaž jååʹđteeivuõđ.

Ciistin One Young World -fooruum haaʹlad uʹvdded tobdstõõzz viiđ nuõrr tuåimtejja, kook lie 18–35 âkksa. Cistt pohtt ouʹdde nuõrr tuåimteeʹjid, kook smeʹllkânji inspirâʹstte da älšmâʹtte jeärrsid tuâjaineez, viõkkšmâʹtte jeärrsid uuʹdeeʹl siʹjjid jiõn da moʹtte tõn, mäʹhtt mainnsid da aaʹššid mušttlet.

Ciist jueʹjjet kålggmannu peäʹlrääʹjest München-gåårdest. Sara Wesslin lââʹssen võboršeʹǩǩen lie 14 tuåimteei pirr maailm.

Sara Wessliiʹne tät pueʹđi vueʹrdǩani.

– Ij veʹt näkam silttâd ni vueʹrdded, što eʹtǩǩee sääʹmǩiõllsaž tuåimteei Âʹvvlest näkam meeraikõskksaž cisttvuäǯǯjen.

Sara Wesslin lij reâuggam Yle sääʹmǩiõllsaž tuåimtõõzzâst, Yle Sääʹmest eeʹjjest 2013 vueʹljeeʹl. Son reâugg tv-, radio- da neʹtt-tuåimteeʹjen di jååʹđat Yle Ođđasat -oođâsvuõlttõõzz. Tuâjstes son âânn nuʹtt sääʹmǩiõl, tâʹvvsääʹmǩiõl ko še lääʹddǩiõl.

Teimma piâzzi čueʹđ inspirõʹstti da vaaikteei neezzan jouʹǩǩe

Jõnn-Britannia õõlmâsradio-õhttõs BBC vaʹlljii Sara Wessliin teimma maaiʹlm čueʹđ inspirõʹstti da vaaikteei neezzan jouʹǩǩe. Tõn mâŋŋa suu tuâjj lij šõddâm tobddsen pirr Euroopp.

Wesslin ceälkk, što suu persoonlaž oʹnnstummšest lij leämmaž positiivlaž vaaiktõs nuõrttsääʹmǩiõllsaž õutstõʹsse. Sääʹmǩiõl mainste nuʹtt 300 ooumžed.

– Sääʹmǩiõll da -kulttuur lie vuäǯǯam samai positiivlaž kuâsttjemvuõđ. Leäm hoʹhssjam, mäʹhtt jeeʹres puõlvvõõǥǥ lie älšmam ââʹnned ǩiõl. Tuäivam, što Lääʹddjânnam še lij mårrnam ååʹn tõõzz, što puk sääʹmǩiõlin lij sââʹjj lääʹdd õhttsažkååʹddest.

JOTY-shortlist
Võboršeeʹǩǩ eeʹjj tuåimteeʹjen lie vaʹlljuum pirr maaʹilm. Govva: One Young World

Tobdstõõǥǥ lie lââʹzztam še Wessliin tuâjjmotivaatio.

– Nuõrrân säättai måtmešt tåbddjed, što lij-a täʹst ni mii jieʹrmid reâuggad nuʹtt uʹcc ǩiõlin, da leäm smiõttâm, što lååkk-a ni ǩii muu ođđsid. Ååʹn toobdam, što tõʹst lij ärvv da tõt miârkkšââvv jiânnai, što uuʹccbõsǩiõʹlle puuʹtʼte ođđsid da mediasiiskõõzzid.

Tuâjj vaarvuâlaž ǩiõlin puuʹtʼtum mediasiiskõõzz ouʹdde juätkkai

Ko Sara Wesslin lij eʹtǩǩuum Eeʹjj tuåimteei -cisttvuäǯǯjen, son vuäǯǯ ââʹnnma One Young World -spesiaalgrafiikk, koon uuʹdet sosiaalʼlaž media vaaikteeʹjid. Wesslin lij-i smiõttâm, mäʹhtt õhtteed tuåimteei da somevaaikteei roolid.

– Teâttlõs tõt pohtt nåkam teädd muʹnne, što õõlǥčem kuâsttjed jäänab, leâša vuäinam, što leäm tuåimteei da reâuǥam sääʹmǩiõllsaž mediasiiskõõzz ouʹdde. Puuʹtʼtam siiskõõzz ǩiõlin, kååʹtt lij vaarvuâlaž.

Pueʹrmõs nääʹll vaaikted lij-i tuâj pääiʹǩ, juurdač Wesslin.

– Haaʹlääm eeʹttkâʹstted nåkam aaʹššid, kook kueʹsǩǩe muu tuåimteeʹjen. Muʹnne lij samai tääʹrǩes äʹšš, što vuäitam vaaikted sääʹm- da jeeʹres uuʹccbõsneezznid, što sij jie taarbšeʹče okkned jiijjâz tuâǥǥõõzz.

Jåårǥlâttam Tiina Sanila-Aikio

Varrasamosat

Muualla Yle.fi:ssä