Sápmi |

Yle ruhtadan Sano se saameksi -prošektii dieđualmmusdahttima stáhtabálkkašupmi

Sano se saameksi -prošeakta oažžu bearjadaga Dieđualmmustahttima stáhtabálkkašumi. Bálkkašumi sturrodat lea 15 000€.

Jietna: Sano se saameksi projekti sai valtion tiedonjulkistamispalkinnon.
Jietna

Sano se saameksi –prošeakta oažžu otne bearjadaga dieđualmmustahttima stáhtabálkkašumi.

Bálkkašuvvon olbmot leat: dokumentarista, doaimmaheaddji Katri Koivula, diktačálli, jorgaleaddji Niillas Holmberg, kodejeaddji Samuli Kaipainen, prográmmaid ráhkadeaddji Mikko Leino ja govaid buvttadeaddji Lille Santanen. Bálkkašumi sturrodat lea 15 000 €. 

Bálkkašumi ággan leat, ahte neahttasiidu earet eará oahpaha geavaheddjiide áittavuloš sámegielaid birra ja seammás ealáskahttá giela. Siiddu giitalit maid das, ahte dat váldá vuhtii viiddes suopmelaš čuozáhatjoavkku ja lasiha áddejumi sámegiela ja -kultuvrra birra.

Ulbmilin lea ealáskahttit áittavuloš sámegielaid

Guovvamánus 2016 álggahan Sano se saameksi -prošeakta lea vuosttas suopma-davvisápmi -neahttasátnegirji interneahtas, mii sisttisdoallá  hállangiela. Prošeavtta ulbmilin lea ealáskahttit áittavuloš sámegielaid.

Frásasátnegirji almmustahttojuvvo čavččamielde maid nuortalaš- ja anárašgillii.

Sano se saameksi –prošeavtta lea ruhtadan Yle ja dan leat ollašuhttán ovttas sápmelaččaiguin.

Oahpahus- ja kulturministeriija mieđiha jahkásaččat dieđualmmustahttima stáhtabálkkašumiid mearkkašahtti áigeguovdilis dahje earenoamáš ja guhkesáigásaš dieđualmmustahttinbarggus. Bálkkašumit mieđihuvvojit dieđualmmustahttima ráđđádallangotti evttohusas ja bálkkašumi juohká oahpahusministeriija Sanni Grahn-Laasonen.

Dahkkit movtta bálkkašumis

Katri Koivula illuda bálkkašumis.

– Lea hui buorre dovdu. Dát lea stuorra dovddasdus ja gudni váldit dákkár bálkkašumi vuostá. Duohta movttiidahtti, dadjá Koivula.

Sano se saameksi
Govva: Sano se saameksi / Annukka Pakarinen

Niillas Holmberg lea álggu rájes maid bargan neahttaprošeavttain jorgaleaddjin ja huksemin konseapta. Holmberg lea rámis dovddastusas.

– Bargu álggii golbma jagi dassá ja earenoamážit illudan Katri beales, gii lea bargan dainna buot eanemus.

Idea neahttasátnegirjái vulggii johtui das, go nuorra olbmot ledje muhtin jagit dassái  eahketdoaluin jođašeamen Tampere gávpogis. Niillas Holmberg moddjesta, ahte jovkui čielggai eahket mielde dat, ahte son hállá sámegiela. Dalle neahttasiiddu doaimmaheaddji Katri Koivula beroštuvai áššis ja háliidii gullat ja báddet sámegiela telefovdnasis. 

– Dan maŋŋá manai muhtin áigi ovdalgo gullen dán prošeavttas fas. Dat lei dalle golbma jagi dassái go mun ledje Guovdageainnus. Fáhkka son riŋgii, ahte sus lea dákkár jurdda ja son sáhtašii daid vuosttas govvamateriálaid vuolgit báddet dál. Nu son girdilii ja bođii dohko Guovdageidnui ja nu dat prošeakta álggii.    

Beaiváduvvon 15.9.2017 dii 14.17: Lasihuvvon Katri Koivula ja Niillas Holmberg kommeanttat. 

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä