Sápmi |

Yle Sámi doaimmaheaddji geahčastat evttohasásaheapmái: ”Eanodagas ja Soađegilis olu rievdadusat njukčamánu ektui”

Sámegielddain Anáris ja Ohcejogas evttohaslisttut eai olus rievdan, muhto Eanodagas ja Soađegilis evttohasásaheamis bohte oalle oluge rievdadusat njukčamánu ektui. Yle Sámi doaimmaheaddji Jouni Aikio lea mannan čađa sámegielddaid evttohaslisttuid.

Jouni Aikio
Yle Sámi doaimmaheaddji Jouni Aikio lea guhká čuvvon válggaid. Govva: Vesa Toppari / Yle

Gielddaválggaid evttohasásaheapmi nogai maŋŋebárgga 4.5. Evttohaslisttuid guđđe jo nuppádassii dán giđa, go álgoálggus válggat galge dollojuvvot cuoŋománus. Koronavirusa dihte stáhtaráđđi, bellodagat ja riikkabeaivvit sirde válggaid sierra lágain geassemánnui ja evttohasásaheapmi joatkašuvai miessemánu álgui.

Sámegielddain Eanodagas ja Soađegilis evttohasásaheamis bohte oalle oluge rievdadusat njukčamánu ektui, muitala Yle Sámi doaimmaheaddji Jouni Aikio.

– Soađegilis bohte nuppelohkái ođđa nama lasi njukčamánu maŋŋá. Jus geahččá ášši olles Lappi eanangotti dáfus, de lea mearkkašahtti, ahte evttohasat gávdnojedje olu lasi.

Soađegilis ođđa evttohasat juohkásit máŋgga sierra listui. Eanemus lassinamaid oaččui čanasmeahttun Kuntalaiset-listu, mii fidnii guhtta evttohasa lasi ja dál listtus leatge oktiibuot 14 nama. Ruonáin lasssánii evttohasaid mearri guvttiin.

Eanodagas bohte maid mearkkašahtti rievdadusat njukčamánu ektui. Máŋggat guovddášbellodaga politihkkárat njuikejedje áibbas ođđa listui, nuba guovddáža listtu geahppánii.

– Enontekiöläisten ääni -listtus leat dál logi evttohasa ja njukčamánus das ledje dušše vihtta. Das lea fuopmášan veara dat, ahte dan listtus leat golbma ovddeš guovddášbellodaga váldostivraáirasa. Maiddái ruonáid listui bođii okta namma lasi ja ruoŧŧelaš álbmotbellodagas fas jávkkai okta namma, čilge Aikio.

Ođđa listtut ihtán sámegielddaide

Anáris ja Ohcejogas evttohasásaheapmái eai boahtán beare olu rievdadusat njukčamánu ektui.

– Anáris bohte moadde lassinama guovddášbellodaga, olgešbellodaga ja vuođđosuopmelaččaid listtuide. Okta namma fas jávkkai olgešbellodaga listtus. Ohcejogas fas lassánii okta namma guovddášbellodaga listui, muitala Aikio.

Jagi 2017 gielddaválgga ektui sámeguovllu gielddain lassánedje evttohaslisttut go Eanodagas vuođđosuopmelaččat ja ruoŧŧelaš álbmotbellodat bidje dál evttohasaid. Ohcejogas fas ođđa listu ovddit válgga ektui lea ruonáin.

Guhká válggaid čuvvon Aikio oaidná mearkkašahttin dan, ahte dál sámegielddaide leat ihttán ođđa listtut.

– Ovddit válgga ektui stuorámus nuppástus sámegielddain lea dat, ahte Eanodagas lea ođđa listu Enontekiöläisten ääni. Doppehan lea álot leamašan bellodagaid olggobeale listu Johtti Sápmelaččat ja nu lea dálge. Soađegilis lea maid ođđa Kuntalaiset-listu.

Guldal dás doaimmaheaddji Jouni Aikio geahčastaga sámegielddaid evttohaslisttuide.

Sámegielddain Eanodagas ja Soađegilis evttohasásaheamis bohte oalle oluge rievdadusat njukčamánu ektui, muitala Yle Sámi doaimmaheaddji Jouni Aikio. Jietna: Jouni Aikio / Yle

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä