Sápmi |

Yle Sámi gažadeapmái vástidan olbmuid oaivilat juohkásit oalle seamma láhkai go sámediggeáirasiid: eanaš oassi doarju válggaid sirdima

Vahkuloahpa áigge 56 olbmo vástidedje Yle Sámi gažadeapmái sámediggeválggaid sirdimis.

Diagrámmagovva das, mo gažadeapmái vástidan olbmuid ja sámediggeáirasiid oaivilat juohkásit das, galgágo sámediggeválggaid sirdit.
Ná Yle Sámi gažadeapmái vástidan olbmuid ja sámediggeáirasiid oaivilat juohkásit das, galgágo sámediggeválggaid sirdit. Govva: Linnea Rasmus / Yle

Yle Sápmi jearai lohkkiid oaiviliid das, galgágo sámediggeválggaid maŋidit.

Vahkuloahpa áigge gažadeapmái vástidedje oktiibuot 56 olbmo. Sis 40:s ledje dan oaivilis, ahte válggaid galgá maŋidit, 13 vástideaddji mielas válggaid ii galgga maŋidit ja golmmas eai dieđe.

Vástideaddjiid oaivilat juohkásit oalle seamma láhkai go sámediggeáirasiid oaivilat. Sámedikki 21 áirasis ja golmma várrelahtus 15:s dorjot evttohusa ovddidit válggaid maŋideami ja oktages dihto eavttuiguin. Čiežas eai doarjjo evttohusa, ja okta ii hálit kommenteret.

Eanet sámediggeáirasiid oaiviliin sáhtát lohkat dáppe.

Sámedikki áirasiin ja várrelahtuin 15:s sirddášedje sámediggeválggaid, čiežas eai ja guoktása oaivilat eai leat čielgasat.
Sámedikki áirasiin ja várrelahtuin 15:s sirddášedje sámediggeválggaid, čiežas eai ja guoktása oaivilat eai leat čielgasat. Govva: Vesa Toppari / Yle

Ákkastallamat beales ja vuostá

Muhtimat Yle Sámi gažadeapmái vástidan olbmuin ákkastalle oaivileaset – eandaliige sii, geat dorjot válggaid maŋideami. Sii bukte ovdan ON olmmošriektekomitea mearrádusa, mii sámediggeáirasiinge leamašan váldoágga válggaid maŋidanfiggamušaide.

Dá muhtin bihtát olbmuid vástádusain:

"ON olmmošvuoigatvuođakomitea mearrádus galggašii váldojuvvot vuhtii čuovvovaš Sámedikki válljemis."

"Nie guhká go sápmelaččain ii leat iešmearrideapmi oba dasge, ahte gii lea sápmelaš, de nie guhká ii sáhte leat doaibmi Sámediggi."

"Lea áibbas čielggas, ahte dakkár Sámediggi, mas leat olu láddelaš lahtut, ii sáhte ovddastit sápmelaččaid iige bastte bargat sápmelaččaid buorrin nu bures go muđui basttášii."

Okta vástideaddji oaidná válggaid maŋideames earáge beali:

"Oažžut sámediggeválggaid measta seamma áigge Ruoŧas, Norggas ja Suomas."

Dušše okta vástideaddji guhte ii doarjjo válggaid maŋideami, ákkastalai iežas oaivila dárkilabbot:

"Aistton Pigga Keskitalo ákkastallan."

Sámediggeáirras Pigga Keskitalo ákkastalai iežas oaivila Yle Sápmái dána:

"Olmmošriektekommišuvnna cealkámuš ii atte makkárge vuođu dasa, ahte galggašii maidige válggaid maŋidit. Dat ii leat Suoma lága mielde. Mu mielas galgá čuovvut lága ja dahkat nugo sámediggelága mielde galgá dahkat. Mun eahpidan, ahte dás sakka uhkiduvvo dakkár vuođđodorvvolašvuohta, mii mis Suomas lea."

Ášši galggašii riikkabeivviide vádjit guovtte vahku siste

Sámedikki dievasčoahkkin galgá maŋŋebárgga mearridit, evttohago dat stáhtii sámediggeválggaid maŋideami. Dan várás stáhtaráđđi galggašii dahkat hohppos láhkaevttohusa Suoma riikkabeivviide.

Jus láhkaevttohus válggaid maŋideamis ovdána riikkabeivviide, galggašii das mearridit jo geassemánus ovdal riikkabeivviid geassebottu.

Dálá áigetávvala mielde sámediggeválggaid evttohasásaheapmi nohká 2.8.2019 ja válggat čáđahuvvojit 2.9.–30.9.2019.

Varrasamosat: Sápmi

Váldoođđasat

Varrasamosat

Muualla Yle.fi:ssä