Sápmi |

Yle Sámi mánáidprográmmaid boares materiálat skeŋkejuvvojedje Sámi Arkiivii

Skeŋkejupmi sisttisdoallá earret eará boares bláđđeartihkkaliid, filmmaid ja reklámadiŋggaid.

Anja Kaarret / Yle
Yle Sámi mánáidsisdoaluid buvttadeaddji Heli Huovinen ja Sámi Arkiivva dikšu Suvi Pilvi King geahčadeigga skeŋkejumi sisdoalu bearjadaga 26.4. Sámi Arkiivvas Sajosis.

Yle sámegielat mánáidprográmmaid boares materiálat leat skeŋkejuvvon Sámi Arkiivii.

Sámemánáid boares rádioprográmma "skuvlarádio", dálá rádioprográmma "Binna Bánna" ja tv-prográmma "Unna Junná" boares materiálat luobahuvvojedje bearjadaga beaivet Sámi Arkiivva vuorkkáide sámekulturguovddáš Sajosii Anárii. Skeŋkejupmi sisttisdoallá earret eará mánáidprográmmain čállojuvvon boares bláđđeartihkkaliid, skuvlarádio bargogirjjiid, dvd-skearruid, main leat Unna Junná filmmažat ja bargobájiin dahkkon prográmmat, ja mánáidprográmmaid reklámadiŋggaid dego šleđggoniid ja biktasiid.

Yle Sámi mánáidsisdoaluid buvttadeaddji Heli Huovinen illuda, go oasáš sámi mánáidprográmmaid historjjás lea dál buorre rájus.

– Mun árvalin, ahte dat leat buorre vuorkkás dáppe, go min bargu lea dakkár, ahte mii johtit ja dávvirat leat gosnu fal rájus. Árvalin, ahte dát livčče dat albma sadji. Dás lea sámi mánáidprográmmaid historjá.

Anja Kaarret / Yle
Skeŋkejupmi sisttisdoallá earret eará boares bláđđeartihkkaliid, filmmaid ja reklámadiŋggaid.

Sámi Arkiivva dikšu Suvi Pilvi King válddii skeŋkejumi vuostá buriin mielain. Materiálaid sáhttá bivdit arkiivvas dutkamušaid váras.

– Dát lea hirbmat dehálaš oassi sámi dálá áiggi mediahistorjjás. Sáhttá mannat vehá áigi dasa, ahte giinu gávdná daid dáppe arkiivvas, go dat lea nu dálá historjá. Muhto dás livčče aivve čielga mediadutkanfáddá geasanu, ovdamearkka dihte das, mo sámi mánáidprográmmat álge, smiehtada King.

Varrasamosat: Sápmi

Váldoođđasat

Varrasamosat

Muualla Yle.fi:ssä