Sápmi |

Yle Sámi Ođasluohkká lea dán jagi Gáregasnjárggas

Gáregasnjárgga badjeskuvlla oahppit ráhkadit dán giđa sisdoaluid Yle Sámi radio-, tv-, neahtta- ja sosiála media kanálaide.

Ođasluohkká 2019
Yle Sámi Ođasluohká, Gáregasnjárgga 7. luohká oahppit. Govva: Xia Torikka / Yle

Yle Sámi Ođasluohká oahppit bohtet dán jagi Ohcejoga Gáregasnjárgga skuvllas.

Ođasluohkká lea Suomas riikkaviidosaš prošeakta, man Yle lea ordnen jagi 2014 rájes. Prošeavtta dárkkuhus lea buoridit nuoraid medialohkandáiddu.

Diibmá Yle Sámi Ođasluohkás ledje mielde Anára badjeskuvlla ja Čeavetjávrri skuvlla oahppit. Dán jagi Yle Ođasluohkkán leat Gáregasnjárgga badjeskuvlla 7. luohká oahppit. Sii besset ieža ráhkadit ođđasiid, mat almmustahttojuvvojit giđa áigge Yle Sámi radioprográmmain, tv-ođđasiin ja neahttasiiddus. Oahppit ráhkadit maid sisdoalu Yle Sámi sosiála media kánalaide.

Ođasluohká ofelažžan bargá Yle Sámi doaimmaheaddji Xia Torikka. Ođasofelaš muitala oahppiide media- ja ođasbarggu birra ja bagada nuoraid sin iežaset ođasáššiiguin.

– Mis lei gaskavahku vuosttas deaivvadeapmi ja dat manai hui bures. Jáhkán min bastit dainna prošeavttain movttiidahttit nuoraid media- ja ođasmáilbmái. Dasa lassin lea nu somá oaidnit, mo nuorat vuitet baluideaset ja dustet hállat radios ja oidnot ja gullot tv:s ja sosiála medias, illuda Torikka.

Yle Ođasluohkká -prošeavttas lea iežas neahttasiidu, gos gávdná buot giđa áigge buvttaduvvon sisdoaluid. Virggálaš Ođasluohká beaivi ávvuduvvo dán jagi cuoŋomáu 25. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä