Sápmi |

Yle Sámi ovddeš hoavda Pirita Näkkäläjärvi atná digitála lávkki dehálamosin – “Buorre vuođđu lávket fas ovddosguvlui”

Näkkäläjärvi hoavdaáigodagas neahttafálaldat lassánii ja Yle Sápmi fállagođii ođđasiid davvisámegiela lassin maid nuortalaš- ja anárašgillii.

Pirita Näkkäläjärvi
Govva: Helga West / Yle

Pirita Näkkäläjärvi muitášišgoahtá mojunjálmmiid jagi 2012. Yle Sámi hoavddabargu rahppui ohcanláhkai, ja Näkkäläjärvi lei áiddo álggahan ođđa barggus Helssegis. Son mearridii riŋget dalá hovdii Juhani Nousuniemii, ahte sáhtášiigo Jusse liikká leat hoavdan vel vehá áigge, dasgo Pirita dovddai, ahte ii lean vel gárvvis guođđit bisnesmáilmmi, vaikko Yle Sámi jođiheapmi leige su guhkesáigásaš, suollemas niehku. Go Nousuniemi dasto goittotge bázii ealáhahkii, ii Näkkäläjärvis lean eará vejolašvuohta, go ohcat barggu.

Näkkäläjärvi, gean duogáš lea ruhtadan- ja strategiijasuorggis, rahkanii Yle bargojearahallamii dego albma strategista: Son lei ráhkadan Yle ođashoavda Atte Jääskeläisii PowerPoint -ovdanbuktima, 5–6 siidosaš dokumeantta iežas čielga višuvnnain.

– Gal mus lei oalle čielga višuvnna, maid mun háliidin, ahte Yle Sámis livččii vel stuorát rolla, diehtojuohkin ovdanivččii ja doaimmahus válddašii digitála máilmmis lávkki ovddosguvlui, speadjalastá Näkkäläjärvi vihta jagi dan maŋŋá, go son álggii hoavdan.

Neahttasiiddus bođii deháleamos ođasgáldu sámemáilmmis

Näkkäläjärvi, gii lea máhcan businessmáilbmái, ja bargá dál Helssegis PwC Strategy& -fitnodagas, gaccai mannan dálvvi gulahallansuorggi oahpu London School of Economics -universitehtas.

Londonis masteroahpuid áigge son áddii, ahte son ovttas doaimmahusain lei ofelažžan doalvumin sámemedia digitála áigodahkii neahttaođasbuvttadeapmi njunnošis. Son atnáge deháleamos olahussan neahttaođasdoaimma ovddideame.

– Jurddašanvuohki rievddai diená, ahte Yle Sámi bargu Yle siste ja Suoma servodagas lea buvttadit árvvu Suoma servodahkii nu, ahte Yle Sápmi buktá sámeperspektiivva álmmolaš ságastallamii. Jurddan lei buvttadit sámeođđasiid, ii dušše jorgalit Suoma ođđasiid sámegillii, muhto namalassii iežamet ođđasiid, álo buktit dan sámeperspektiivva ođđasiidda, ja deháleamos, ahte Yle Sápmi galgá leat vuosttamus, mii muitala sámeođđasiid, ovdal buot eará mediaid nu ahte lea máŋga lávkki ovddabealde, čilge son.

Pasilas celke, ahte nuortalaš- ja anárašgillii ii sáhte nehttii čállit

Näkkäläjärvi hoavdaáigodagas álggahuvvui neahttaođasdoaibma sihke nuortalaš- ja anárašgillii, vaikko álggus Pasilas son oaččui máhcahaga, ahte dat ii leat vejolaš: dáin gielain ii leat vejolaš čállit nehttii. Son ii duhtan čilgehussii.

– Yle Sámi neahttasiidu lea nu dehálaš. Dat, mii iđđes lea neahtas, dat čájeha, mii lea dehálaš dán min máilmmis. Ja buot gielat fertejit leat doppe, dat loktejit dan sájadaga ja árvvu ja juohke láhkái dan beaggima olbmuid mielas. Muhto dathan gal čoavdašuvai johtilit. Yle Sámis leat gal hárjánan gávdnat máŋggalágan čovdosiid, moddjá Näkkäläjärvi.

Yle Ođđasat fállá sisdoalu maiddái váldoálbmogii

Hoavdda bargui gullá ovddidit maid radio- ja tv-fálaldagaid. Jagis 2013 álggahuvvojedje Sohkkaršohkka nuoraidprográmma ja Yle Ođđasat, man mearkkašumi Näkkäläjärvi atná dehálažžan riikkadásis.

– Tv:s lea goittotge nu stuorra fápmu, ahte go doppe lea sátta sámegillii, na de das lea hirbmat stuorra árvu. Sáhttá juoba dadjat, ahte dat lea dihtoláhkai dakkár váikkuhanvejolašvuohta dasa, ahte váldoálbmot obalohkái oažžu dieđu sámiid birra, jurddaša son.

Vaikko sámemedia sisdoallu beroštahtášii suopmelaš lohkki ja guldaleaddji, Yle Sámi váldobargu lea goittotge fállat mediasisdoalu sámegiellagiidda, eaige dálá resurssat reahkká iešguđetlágan sámejoavkkuid viiddes bálvaleapmái. 

Sávvá sámemedia vuodjut sámepolitihkii

Yle Sámi fálai maid jagis 2015 sámediggeválggaid válgagalleriija, man ulbmilin lei lasihit sámepolitihka čađačuovgilvuođa ja diehtojuohkima jienasteddjiid, suopmelaš lohkkiid ja politihkáriid gaskkas.

Näkkäläjärvi, gii dál čuovvu sámemedia lohkkin ja guldaleaddjin sávváge beassat lohkat ja gullat eanet sámepolitihka detáljaid birra. Vaikko son vuođđudii stuorra medialávddiid, ii son bastán čalmmustahttit servodatáššiid dan viidodagas, go livččii háliidan.

– Okta jurdda leamašan, ahte radios galggašii leat eambbo čiekŋalis servodatságastallan ja mus leamašan dat niehku, ahte tv:s livččii sámiid iežas A-studio, dakkár talk-show, mas livččii namalassii servodatságastallan. Dahje, ahte Yle Sámis livččii radiobealde oktii vahkus dakkár politihkaradio, mas sáhtášii vuodjut servodattemaide, smiehtađisgoahtá son.

Go Yle Sápmi oažžu ođđa hoavdda, bohciidahttá dat maid vuordámušaid, nu maiddái Näkkäläjärvis.

– Mun oainnán, ahte dan mu áigodagas, mii lei dat njeallje jagi, na dalle huksejuvvui nana vuođđu ja máhttu dasa ođasmuvvamii. Mun čuovun Yle Sámi doaimmahusa čehppodaga, buvttadeami ja ovdáneami ain, juohke beaivve! Dál lea buorre vuođđu lávket fas ovddosguvlui, ja ohcat, man guvlui sáhtášii vel ođasmuvvat. Sávan oaidnit roahkadis, ođđalágan fálaldagaid das, gii válljejuvvo čuovvovaš hoavdan, cealká Näkkäläjärvi.

Pirita Näkkälärvi  ollesradiojearahallama sáhttát guldalit Yle Sápmi 70 -ávvusáddagis. Ávvusátta sáddejuvvo bearjadaga 6.10.2017 diibmu 10.30 - 13.30. 

Varrasamosat: Sápmi

Váldoođđasat

Varrasamosat

Muualla Yle.fi:ssä