Sápmi |

Yle Sámi válgatenttes evttohasat suoskkadit sámeguovllu eanangeavaheami, dálkkádatnuppástusa ja sápmelašmeroštallama – geahča Yle Areenas ja guldal radios diibmu 14–16

Yle Sámi vuossárgga válgagažadeapmái oassálastet 12 bellodaga ovddasteaddjit.

Yle Sámi válgatentte láidesteaddjiguovttos Jouni Aikio ja Aslak Paltto.
Yle Sámi válgatentte láidesteaba doaimmaheaddjit Jouni Aikio ja Aslak Paltto. Govva: Vesa Toppari / Yle

Yle Sámi riikkabeaiválgatenttes vuossárgga 8.4. evttohasat besset muitalit oainnuideaset earret eará sámeguovllu eanangeavaheamis, dálkkádatnuppástusas ja sápmelašmeroštallamis. Dát leat áššit, main Yle Sámi lohkkit muitaledje hálidit diehtit evttohasaid oaiviliid.

Yle Sámi tentii oassálastet Gurutlihtu evttohas Anni Ahlakorpi Ohcejogas, Ruoná lihtu evttohas Pekka Aikio Soađegilis, Suoma Guovddášbellodaga evttohas Pigga Keskitalo Eanodagas, Suoma sosiálademokráhtalaš bellodaga evttohas Anni Koivisto Ohcejogas, Suoma kristtalašdemokráhtaid evttohas Kitti Kumpulainen Anáris, Ruoŧŧelaš álbmotbellodaga evttohas Sammol Antti Lukkari Ohcejogas, Olgešbellodat Kokoomus evttohas Tanja Sanila Anáris, Čieža nástti lihkadusa evttohas Jukka Sarre Anáris ja Vuođđosuopmelaččaid evttohas Veikko Siitonen Gihttelis.

Unna bellodagaid, main ii dán dilis leat ovddastus riikkabeivviin, ovddastit Feministtalaš bellodaga evttohas Katju Aro Helssegis, Suoma kommunisttalaš bellodaga evttohas JP (Juha-Pekka) Väisänen Helssegis ja Kommunisttalaš bargiidbellodaga evttohas Mikko Vartiainen Porvoos.

Yle Sápmin vaalitentti 8.4.2019
Válgaságastallamis guhtta evttohasa ledje válgastudios, golmmas oassálaste Skype-oktavuođain. Golmmas vel ledje searvat Skype bokte muhto oktavuohta ii doaibman dahje boatkanii gaskan ságastallama. Govva: Yle Uutisgrafiikka

Yle Sápmi lei bovden tentii evttohasa juohke registrerejuvvon bellodagas.

Yle Sámi riikkabeaiválggaid 2019 válgatente sáddejuvvo vuossárgga 8.4.2019 diibmu 14–16 njuolga sihke Yle Sámi radiokanálas ja videostreaman Yle Areenas. Tente lea sáme- ja suomagielat. Dan láidesteaba doaimmaheaddjit Aslak Paltto ja Jouni Aikio.

Tentte lea vejolaš sihke guldalit ja geahččat maiddái maŋŋelabbos Yle Areenas.

Divvojuvvon 8.4.2019 diibmu 10:36: Suoma kommunisttalaš bellodat rievdadii evttohas Iro Isberg sadjái JP (Juha-Pekka) Väisänen.

Varrasamosat: Sápmi

Váldoođđasat

Varrasamosat

Muualla Yle.fi:ssä