Yle Sápmi

Yle Sápmi – Sámi jietna

Ovdasiidu / Yle Sápmistä suomeksi / Dávjodatdieđut / Taajuustiedot / About Yle Sápmi IN ENGLISH

Sámi jietna

Yle Sápmi lea Sámi jietna. Yle Sápmi buvttada sisdoaluid radioi, tv:i ja internehttii golmmain Suomas hállojuvvon sámegielain: davvisáme-, anáraš- ja nuortalašgillii.

Yle Sámi Radio prográmmadieđut Yle radioofelaččas (vállje Yle Radio Suomi vuolde Yle Sámi Radio).

Yle Sápmi lea deháleamos Sámi media Suomas. Neahtta lea min dehalamos ođaslávdi, radio lea min dehalamos giellaealáskahttinlávdi ja tv:s mii fállat vásáhusaid ja ealláhusaid. Sosiála medias mii leat olles áigge oktavuođas min álbmogiin.

Yle Sápmi ollašuhtta Yle sámegielat almmolaš bálvalusa ja Yle strategiija.

Yle Sámis barget sullii 20 olbmo Anáris, Eanodagas ja Helssegis.

Yle Sápmi oaččui guokte sámi bálkkašumi jagis 2013: Sámi giellaráđđi juolludii Yle Sápmái Jagi Sámi gielladagu 2013 ja Saa'mi Nue'tt -searvi nammadii doaimmahusa Jagi nuortalažžan 2013.

Yle strategiija stivre Yle Sámi

Yle strategiija stivre Yle Sámi doaimmaid. Yle Sápmi lea okta Yle Ođas- ja áigeguovdilisdoaimma Guovloradioin, muhto Yle strategiija mielde Yle Sápmi bálvala álbmoga olles Suomas.

Yle ulbmilin leat leat olles álbmoga Yle ja dan strategalaš ulbmilat leat bálvalit buot suopmelaččaid, buvttadit árvvu servodahkii ja hálddašit buoremus mediamáhttu.

Yle árvvut leat luohttehahttivuohta, sorjjasmeahttunvuohta ja olbmo gudnejahttin. Yle višuvdna lea dahkat máilmmidási almmolas bálvalusa. Yle mišuvdna lea nannet suopmelaš servodaga ja kultuvrra, ja fállat buohkaide dieđu, čuvgehusa, fuomášumiid ja eallámušaid.

Yle Sápmi bálvala buot sápmelaččaid. Yle Sápmi buvttada árvvu servodahkii, go dat muitala mii sámi servodagas dáhpáhuvvá ja mas sámi servodagas ságastallojuvvo. Dan Yle Sápmi bargá sámegiel doaimmahusa návccain. Fuolákeahttá sámegiel vuolggasajis, doaimmahus geahččala gieđahallat válljejuvvon fáttáid mánggabealágit ja sierra perspektiivvain. Doaimmahus buktá ságastallamii álo sierra jienaid máŋggain gielain. Ná, vaikke Yle Sámi váldobargun lea namalassii sámegiel almmolaš bálvalus.

Ođđasiin lea davviriikalaš visuvdna

Ođđasiin lea oktasaš, davviriikalaš višuvdna. Davviriikalaččat Ođđasat galgá leat dehálamos gáldu dasa, mii Sámis ja eará álgoálbmotguovlluin dáhpáhuvvá. Davviriikalaš sámi ođasárvvut leat luohttehahttivuohta, duostilvuohta, álbmoga bálvaleapmi ja sámevuohta. Yle Sápmi, NRK Sápmi, SVT Sápmi ja SR Sápmi leat ovttas čatnasan dáid ođasárvvuide.

TV:s guokte ođassáddaga

YLE OĐĐASAT ÁRGABEIVVIID 16.45 YLE TV1:ŽIS

Yle Ođđasat -sátta oidno árgabeivviid diibmu 16.45. Sáddaga guhkkodat lea vihtta minuhta. Yle Ođđasat -sáddagis leat gaskamearalaččat 120 000 geahčči.

Yle álggahii Yle Ođđasiiid, Yles iežas sámegiel doaimmahusa buvttadan tv-ođassáddaga, Yle TV1:žis 2.12.2013.

Anáris čohkkejuvvon tv-ođassátta dievasmahttá Yle Sámi ođasfálaldaga, masa gullet Yle Ođđasat -radioođđasat iđđedis ja eahketbeaivve, interneahttabálvalus golmma Suomas hállojuvvon sámegillii sihke árgaeahkediid davviriikalaš sámi tv-ođđasat. Ođđa riikaviidosaš sátta bálvala erenoamažit sámeguovllu olggobealde ássi sápmelaččaid ja maid earáid, geat leat beroštuvvan sámeáššiin, go sátta tekstejuvvo suomagillii.

Yle Ođđasiid sáhttá geahččat mańotbaji Yle Areenas, maid Suoma rájáid olggobealde.

Ođđasiid lassin Yle tv-kanálain čájehuvvo Unna Junná -mánáidprográmma golmma sámegillii.

OĐĐASAT ÁRGABEIVVIID EAHKEDIS

Ođđasat oidno olles geasi árgabeivviid TV1:žis maŋŋit eahkeda ođđasiid oktavuođas. Yle Areenas sátta lea oaidninláhkai dmu 22.

Davviriikalaš sámegiel tv-ođđasat, Ođđasat, lea dehálamos gáldu dasa, mii Sámis ja eará álgoálbmotguovlluin dáhpáhuvvá. Davviriikalaš sámi ođasárvvut leat luohttehahttivuohta, duostilvuohta, álbmoga bálvaleapmi ja sámevuohta. Yle Sápmi, NRK Sápmi, SVT Sápmi ja SR Sápmi leat ovttas čatnasan dáid oktasaš ođasárvvuide.

Ođđasat, davviriikalaš sámi tv-ođđasat, oidnojit olles Suomas Yle Fem -kanálas juohke árgabeaivve diibmu 20.45. Ođđasat oidnojit maid Yle Areenas.

Interneahtta ja Yle Areena

Yle Sámi interneahttasiiddut leat deháleamos sámegiel ođasmedia Suomas – golmma sámegillii ja suomagillii.

Yle Sámi radio- ja tv-sisdoalut gávdnojit Yle Sámi siiddus Yle Areenas. Yle Sámi radiokanála sáhttá guldalit gos beare máilmmis Yle Areena -interneahttaradio ja mobiltelefonapplikašuvnnaid bokte.

Yle Sápmi lea Facebookas, Twitteris ja Instagramis sihke Vimeos ja Snapchatis (ylesapmi).

Yle Sámi neahttasiidduin almmustahttojuvvojit buot ođasdoaimmahusa buvttadan ođđasat ja dihto anáraš- ja nuortalašgiel ođđasat. Mii čállit ođđasiid measta spiehkastaga haga vuos sámegillii.

Muhtin neahttaođđasiid mii jorgalit maid suomagillii. Suomagiel ođđasiid buvttadeamis mii giddet erenoamaš fuomášumi máŋggabealát ja dásseárvosaš buvttadeapmái guhkkit áigodagas, daningo dálá resurssain Yle Sámis ii leat vejolaš buvttadit suomagillii go gaskamearalaččat ovtta ođđasa beaivvis. Sámegiel almmolaš bálvalus lea goittotge Yle Sámi váldobargu. 

Yle Sámi neahttaođđasiid kommenteren lea gitta, muhto ođđasiid sáhttá kommenteret min sosiála media lávddiin Facebooks, Twitteris ja Instagramis sihke neahttaradio čuorvunlođás Yle-dovddaldagain.

Yle Sápmi rabai iežas interneahttafálaldaga golggotmánus 1997 Sámi Radio 50-jagi ávvudeami oktavuođas. Yle Sápmi válddii atnui ođaduvvon neahttasiidduid giđđat 2010. Yle Sámi interneahttafálaldagat leat fidnemis sámegielaid lassin maiddái suoma- ja eaŋgalasgillii.

Radio

Radio lea Yle Sámi dehalamos giellaealáskahttinbargoneavvu – golmma sámegillii.

Yle Sápmi sádde radioprográmmaid sullii 1 600 diimmu jagis.

Čakčat 2016 álggii davviriikalaš iđitsátta, mas leat Yle Sámi lassin mielde SR Sameradion ja NRK Sápmi. Buorre iđit Sápmi -sátta boahtá juohke árgabeaivve dbm 8.00-10.00 Suoma áigge.

Yle Sámi iežas sátta lea Dearvva! Tiõrv! Tiervâ! ja dat boahtá juohke árgabeaivve dbm 11.00-13.00. Sáddaga sáhttá guldalit maiddái interneahtta bokte.

Radios lea stuorra mearkkašupmi sámegiela ovddideamis ja sámi identitehta nannemis. Interneahtta- ja tv-fálaldagat dievasmahttet radiosáddagiid. Mii doaibmat olles sámeguovllus lagas beaivválaš oktavuođas NRK Sámiin, SVT Sámiin ja SR Sámiin.

Beaivválaš áigeguovdilis sáddagat dievasmahttet ođđasiid ja čilgejit áššiid duogážiid. Yle Sápmi muitala sámi ságaid, muhto maiddái deháleamos ođđasiid Davviriikkain ja eará máilmmis.

Nuorra ollesolbmuide radiosátta Sohkaršohkka gullo juohke duorastaga diibmu 17.30–20.00 ja nuppádassii bearjadaga seamma áigge. Geassit Sohkaršohkka váldá bottu.

Radio lea dieđusge diehtojuohkingaskaoapmi, muhto Yle Sápmi doalvu maiddái kultuvrra ovddosguvlui. Yle Sámi sáddagiin gulat sámi musihka, máidnasiid, muitalusaid ja ságaid sápmelaččaid árgabeaivvis ja maiddái erenoamáš dáhpáhusain - ja buot sámegillii. Yle Sápmi fállá maiddái mánáid- ja nuoraidprográmmaid ja vuoiŋŋalaš sáddagiid.

Yle Sápmi ođasmahttá sámegiela. Radio bokte leat leavvan olu ođđa sánit ja dajaldagat, mat adnojit dálá servodagas ja eallimis. Dása lassin radio lea buvttadan giellagurssaid sámegiela oahpahalliide. Radio lea fuolahan oasistis unnitlogu suopmaniid bálvalusain. Yle Sámis leat vahkkosaš sáddagat sihke nuortalaš- ja anárašgillii.

Yle Sápmi sádde sámegielat radioprográmmaid sullii 1 600 diimmu, NRK Sápmi 1700 diimmu ja SR Sámi radio 700 diimmu jagis.

Davviriikkalaš sámi radioid ovttasbargu lea nannen sápmelaččaid oktiigullevašvuođa. Radio lea muitalan ságaid Suoma, Norgga, Ruoŧa ja Ruošša sámiid áššiin oppa Davvikalohta sápmelaččaide. Sámeradiot lonohallet prográmmaid gaskaneaset.

Tv-ođđasiid historjá

Tv-ođđasiin lea buot eanemusat geahččit, jos geahččá buot Yle Sámi sisdoaluid iešguđet lávddis.

Yle Ođđasat oidnojit juohke árgabeaivve diibmu 16.45 Yle TV1:žis, Yle váldoođaskanálas tv:s earret geasseáigge. Davviriikalaš sámi tv-ođđasat, Ođđasat, oidnojit Suoma Yle TV1 -kanálas juohke árgabeaivve maŋiteahkedis.

Yleisradio searvvai davviriikkalaš sámegiel tv-ođđasiidda jagi 2002 álggus. Norgga riikkaradio NRK ja Ruoŧa televišuvdna SVT ledje álggahan oktasaš tv-ođđasiid sámegillii čakčat 2001. Álggos tv-ođđasat ledje árgabeivviid logi minuhta viđa geardde vahkus. Jagi 2002 álggu rájes golmma riikka oktasaš tv-ođđasiid sáddenáigi lea árgabeivviid 15 minuhta viđa geardde vahkus.

Giđđat 2013 Yle mearridii álggahit Ođđasiid lassin iežas sámegiel tv-ođđasiid, Yle Ođđasiid, ja hukset tv-studio Anárii. Yle Ođđasat -nammasaš tv-sátta álggii juovlamánus 2013 váldoođaskanála Yle TV1:žis.

Ovdasiidu

Muualla Yle.fi:ssä