Sápmi

Yle Sápmi čuovui gielddaválggaid bohtosiid: Buot sámegielddaid válgabohtosat leat gárvá, gávpotstivrraide ja sámeguovllu olggobeale váldostivrraide besse maid sápmelaččat

äänestyspaikka Inarissa
Anáris olbmot fitne vel maŋimuš diimmuid áigge sotnabeaivve jienasteamen Sámekulturguovddáš Sajosa girjerájus. Govva: Vesa Toppari / Yle

Gielddaválggat doaimmahuvvojedje sotnabeaivve 13.6. Yle Sápmi čuovui válggaid bohtosiid dán artihkkalis. 

Jagi 2021 gielddaválggat ledje sotnabeaivve 13.6. Yle Sápmi čuovui válggaid bohtosiid erenomážit sámeguovllu gielddaid ja sápmelaš evttohasaid oasil.

Válgalanjat manne gitta sotnabeaivve 13.6. diibmu 20 ja dan maŋŋá rehkenastigohte jienaid.

Yle Sápmi sáddii válgavuoitiid kommeanttaid ja válgaanalysaid vuossárgga 14.6. radio- ja tv-sáddagiin.

Válgabohtosiid sáhttá geahččat Yle válgaboađussiiddus.

16.6. dii. 15.46 Ohcejoga maŋimuš váldostivrabáiki vuorbáduvvui golmma evttohasa gaskkas

Sotnabeaivvi dollojuvvon gielddaválggain válgaboađus bázii Ohcejogas rabas, go golbma evttohasa ožžo seamma jietnameari, 19 jiena, ja sii gulle seamma válgalihtu evttohaslisttu sisa.

Sii ledje Kristtalaš demokráhtaid evttohas Pirjo Konttinen ja olgešbellodat Kokoomus evttohasat Veikko Porsanger ja Petteri Valle.

Ohcejoga válgalávdegoddi šattai vuorbádit maŋimuš báikkis. Vuorbádeami vuittii Pirjo Konttinen. Olgešbellodaga vuosttaš várreáirrasbáikki oaččui Veikko Porsanger.

13.6. dii. 22.45 Vihtta sámediggeáirasa dahje várrelahtu čohkkájit dás duohko maid gielddastivrras

Sámediggeáirasiin gielddaid váldostivrraide besse Ruonáid listtus Juha Alakorva Soađegilis, Sosiálademokráhtaid listtus Anni Koivisto Anáris, Ruonáid listtus Pirita Näkkäläjärvi Anáris ja olgešbellodat Kokoomus listtus Anu Avaskari Anáris. Sámedikki Ohcejoga várrelahttu Sámmol Lukkari beasai Ohcejoga gieldda váldostivrii olgešbellodat Kokoomus listtus.

Evttohassan gielddaválggas ledje maiddái sámediggeáirasat Veikko Porsanger Ohcejogas, Aslak Pekkala Anáris ja Tanja Sanila Anáris sihke Sámedikki Anára várrelahttu Teija Linnanmäki. Dát njealjis ledje evttohassan olgešbellodaga Kokoomus listtuin eaige dán vuoro beassan gieldda váldostivrii.

Beaividuvvon 14.6. dii. 14.20: Lasihuvvon bellodagaid namat ja diehtu Teija Linnanmäkis.

13.6. dii. 22.33 Anára válgaboađus lea gárvvis – Olgešbellodat Kokoomus manahii báikkiid

Anára 27 váldostivrrabáikki juohkásit ná: Guovddášbellodat 7 báikki, Kokoomus 7 báikki, SDB 4 báikki, Vuođđosuopmelaččat 3 báikki, Gurutlihttu 2 báikki, Ruonát 2 báikki, RÁB 1 báiki ja Kristtalašdemokráhtat 1 báiki.

Vuođđosuopmelaččat ožžo ođđa váldostivrii golbma áirasa, dálá váldostivrras sis ii leat oktage báiki. Olgešbellodat Kokoomus manahii dáid válggain golbma báikki, Gurutlihttu guokte báikki ja Ruonát ovtta báikki. Guovddášbellodat, RÁB ja Kristtalašdemokráhtat manahedje buot ovtta báikki.

Anára gieldda jietnahárát lei Sosiálademokráhtalaš bellodaga Anni Koivisto 200 jienain. Nubbin eanemus jienaid čokkii Olgešbellodat Kokoomus Jari Huotari 169 jiena ja seamma bellodagas Anu Avaskari 135 jiena.

Anni Koivisto
Anni Koivisto leamaš ovdal Ohcejoga váldostivraáirras. Govva: Marja Väänänen / Yle

Guldal dás Anni Koivisto jearahallama. Jietna: Susanna Guttorm / Yle

13.6. dii. 23.27 Gávpotstivrraide ja sámeguovllu olggobeale váldostivrraide beasse maid sápmelaččat

Ruonáid evttohas Juha Tapiola, gii lea eret Ohcejogas, oaččui 284 jiena ja lea beassan ođđa Lahti gávpotstivrii.

Sosiálademokráhtalaš bellodaga evttohas Mikkel Näkkäläjärvi, gii lea eret Anáris, oaččui 344 jiena ja beasai Roavvenjárgga gávpotstivrii.

Olgešbellodat Kokoomus Heikki Autto beasai maid Roavvenjárgga gávpotstivrii 880 jienain.

Vuođđosuopmelaččaid evttohas Pekka Hetta, gii lea eret Vuohčus, oaččui 282 jiena ja beasai Oulu gávpotstivrii.

Gihttelis Olgešbellodat Kokoomus sápmelaš evttohas Aslak Niittyvuopio, gii lea eret Ohcejogas, oaččui 34 jiena ja beasai várresadjái.

Ruonáid evttohas Janne Hirvasvuopio, gean máttut leat eret Vuohčus, oaččui 339 jiena ja beasai várresadjái Espoo gávpotstivrii.

Beaividuvvon 13.6. dii. 23.27: Lasihuvvon diehtu Pekka Hetta čađamannamis.

Beaividuvvon 14.6. dii. 8.01: Divvojuvvon loahpalaš bohtosiin.

Beaividuvvon 14.6. dii. 9.27: lasihuvvon diehtu Heikki Auttos.

13.6. dii. 22.18 Soađegili válgaboađus lea gárvvis – oktasašlistu Kuntalaiset rábádii čieža váldostivrrabáikki

Válggas eanemus báikkiid manahedje Guovddášbellodat ja Gurutlihttu, guktuin geahppánedje golbma báikki. Guovddášbellodagas lea goit ain stuorámus váldostivrrajoavku gávcciin báikkiin.

Olgešbellodagain Kokoomus ja Vuođđosuopmelaččat fidnejedje guktot golbma báikki. Ruoná lihttu ja Gurutlihttu fidnejedje guktot guokte báikki, sosiálademokráhtaid ja Kristtalašdemokráhtaid guktui ovddasta váldostivrras okta áirras.

Soađegilis jienaid hárábaste eanemus Tuula Annala (Kokoomus) 235 jiena, Riikka Karppinen (Ruoná lihttu) 196 jiena ja Krista Stauffer (Kuntalaiset) 188 jiena.

13.6. dii. 21.50 Ohcejoga válgaboađus lea gárvvis – Guovddášbellodat bissu stuorámus bellodahkan

Ohcejoga 15 váldostivrrabáikki juohkásit ná: Guovddášbellodat 5 báikki, Olgešbellodat Kokoomus 4 báikki, SDB 2 báikki, Vuođđosuopmelaččat 1 báiki, Gurutlihttu 1 báiki, Kristtalašdemokráhtat 1 báiki ja RÁB 1 báiki.

Olgešbellodat Kokoomus lasihii ovtta báikki dálá váldostivrra ektui ja Gurutlihttu fas manahii ovtta báikki. Muđui eai dáhpáhuvvan stuorát nuppástusat.

Eanemus jienaid lea čoaggán Ruoŧŧelaš Álbmotbellodaga evttohas ja Gálddoaivve bálgosa boazoisit Vesa Länsman 56 jiena. Nubbin eanemus lea čoaggán Kristtalaš demokráhtaid Väinö Guttorm 46 jiena ja goalmmádin fas Vuođđosuopmelaččaid Ismo Manninen 45 jiena.

Vesa Länsman
Ohcejoga jietnahárát dáid gielddaválggain lei Vesa Länsman RÁB:s. Govva: Jouni Aikio / Yle

Guldal Vesa Länsman jearahallama dás. Jietna: Susanna Guttorm / Yle

13.6. dii.21.45 Soađegilis golbma njealjádasa jienain lohkkojuvvon – Gurutlihttu manaha golbma báikki

Go Soađegili jienain lea lohkkojuvvon badjelaš 75 proseantta de Guovddášbellodat lea stuorámus, dat lea fidnen 30,0 % jienain. Kuntalaiset-listtu jietnaossodat lea 22,8 %, olgešbellodat Kokoomus 13,4 %, Gurutlihttu 9,5 %, Vuođđosuopmelaččat 9,4 %, Ruoná lihttu 9,1 %, sosiálademokráhtat 4,1 % ja kristtalašdemokráhtat 2 % jienain.

Guovddášbellodat seailu stuorámus joavkun, vaikko dat manahivčče guokte báikki de das livčče ain eanemus, ovcci báikki. Ođđa Kuntalaiset listu fidnešii čieža báikki, olgešbellodat Kokoomus golbma báikki.

Gurutlihttu, Vuođđosuopmelaččat ja Ruoná lihttu guhtege fidnešii guokte báikki, Sosiálademokráhtat ja Kristtalašdemokráhtat fidnešedje guktot ovtta báikki.

13.6. dii. 21.38 Ohcejogas lohkkon sullii 77 proseanta jienain, eanemus jienaid lea čoaggán Vesa Länsman

Ohcejogas eai oro šaddamin stuorát nuppástusat dálá váldostivrra ektui. Guovddášbellodat lea manaheamen ovtta báikki, SDB ja Kristtalašdemokráhtat leat oažžumin goabbáge ovtta báikki lasi.

Eanemus jienaid dán muttus lea čoaggán Ruoŧŧelaš Álbmotbellodaga evttohas ja Gálddoaivve bálgosa boazoisit Vesa Länsman 46 jiena. Nubbin eanemus lea čoaggán Vuođđosuopmelaččaid Ismo Manninen 36 jiena ja goalmmádin Kristtalaš demokráhtaid Väinö Guttorm 33 jiena.

13.6. dii. 21.23 Anáris lohkkon sullii 75 proseantta jienain, eanemus jienaid lea čoaggán Anni Koivisto

Anáris orru ovddeš váldebellodat Kokoomus manaheamen 3 váldostivrrabáikki go sullii 75 proseantta jienain lea lohkkon. Guovddášbellodat fas orru oažžumin guokte báikki lasi ja Vuođđosuopmelaččat leat oažžumin 3 váldostivrrabáikki. Dálá váldostivrras sis ii leat oktage báiki.

Eanemus jienaid dán muttus Anáris lea čoaggán Sosiálademokráhtalaš bellodaga evttohas ja Sámedikki várreságadoalli Anni Koivisto. Nubbin eanemus jienaid lea dán muttus čoaggán Olgešbellodat Kokoomusa Jari Huotari 123 jiena ja goalmmádin Kokoomus Anu Avaskari 102 jiena.

13.6. dii. 21.13 Eanodagas válgaboađus lea gárvvis – Leena Palojärvi fidnii eanemus jienaid ja su listu vihtta báikki

Eanodaga váldostivrra 17 báikki juohkásit ná: Oktasašlistu Enontekiöläisten ääni fidnii vihtta báikki, olgešbellodat Kokoomus golbma báikki, Guovddášbellodat golbma báikki, Ruoná lihttu guokte báikki, Johtti sápmelaččat guokte báikki, Vuođđosuopmelaččat ovtta báikki ja kristtalašdemokráhtat ovtta báikki.

Golbma eanemus jienaid ožžon evttohasat leat Leena Palojärvi (Enontekiöläisten ääni) 70 jiena, Birgitta Eira (Ruoná lihttu) 69 jiena ja Pekka Tjäderhane (olgešbellodat Kokoomus) 68 jiena.

Dálá váldostivrra ságadoalli Seppo Alatörmänen gahčai dán válggas eret váldostivrras. Badjel bealli, ovccis, leat ođđa áirasat Eanodaga váldostivrras.

keskustan puoluekokousedustaja Leena Palojärvi Enontekiöltä.
Leena Palojärvi njuikii eret Guovddášbellodaga listtus dáid válggain. Govva: Jarmo Honkanen / Yle

Guldal Leena Palojärvi jearahallama, doaimmaheaddjin Jouni Aikio Jietna: Yle Areena

13.6. dii. 21.06 Janne Hirvasvuopio várresajis Espoos

Ruonáid evttohas Janne Hirvasvuopio Espoos lea dál várresajis. Dán rádjái son lea čoaggán oktiibuot 106 jiena go sullii 30 proseantta jienain leat lohkkon.

13.6. dii 20.50 Eanodagas guovddášbellodat manaha váldesaji, ođđa bellodagaid olggobeale listu čohkken eanemus jienaid

Go guokte goalmmadasa jienain leat lohkkojuvvon de čájeha, ahte ođđa listu Enontekiöläisten ääni, man evttohasat leat luovvanan bellodagain fidne eanemus guottáhusa: 31,9 % ja dat mearkkaša guhtta báikki Eanodaga váldostivrras. Olgešbellodat Kokoomus fidnii ovdajienain 20,4 % (+11,1), guovddášbellodat 15,3 (-33,7), Johtti sápmelaččat 9,7 % (-6,1), vuođđosuopmelaččat 9,0 % (+9.0), ruonát 8,1 % (- 0,7) ja kristtalašdemokráhtat 3,6 % (-3,5).

Guovddášbellodat manaha guhtta báikki ja seammás eanetlogu váldostivrras, dat fidnešii dál dušše golbma báikki. Olgešbellodat fidne maid golbma báikki, Johtti Sápmelaččat guokte báikki, vuođđosuopmelaččat, ruonát ja kristtalašdemokráhtat guhtege ovtta báikki.

Go jienain lea lohkkojuvvon 66 % de Eanodaga váldostivrii boađášedje ovcci ođđa áirasa.

13.6. dii. 20.40 Aslak Niittyvuopio Gihttelis dál várresajis

Gihttelis Olgešbellodat Kokoomusa evttohas Aslak Niittyvuopio lea dál várresajis 19 jienain go jienain lea lohkkon sullii 61 proseantta.

13.6. dii. 20.36 Mikkel Näkkäläjärvi livčče beassamin Roavvenjárgga gávpotstivrii

Roavvenjárggas Sosiálademokráhtalaš bellodaga evttohas Mikkel Näkkäläjärvi livčče dálá bohtosiid mielde mannamin gávpotstivrii. Son lea ožžon 218 ovdajiena dán rádjái go jienain lea lohkkon sullii 63 proseantta.

13.6. dii. 20.22 Anáris ovdajienaid ožžo eanemus Kokoomus ja Guovddášbellodat

Anáris ovdajienasteamis eanemus jienaid lea ožžon Olgešbellodat Kokoomus 29,2 proseantta ja Guovddášbellodat 28,9 proseantta go jienain lea lohkkon sullii 48 proseantta.

Eará bellodagat: SDB 12,3 proseantta, Vuođđosuopmelaččat 12,1 proseantta, Gurutlihttu 10,3 proseantta, Ruonát 4,9 proseantta ja Kristtalašdemokráhtat 1,2 proseantta.

Dán rádjái eanemus ovdajienaid lea čoaggán Olgešbellodat Kokoomusa Jari Huotari 103 jiena, nubbin Olgešbellodat Kokoomusa Anu Avaskari 69 jiena ja goalmmádin Sosiálademokráhtalaš bellodaga Anni Koivisto 67 jiena.

13.6. dii. 20.19 Ohcejogas Guovddášbellodat lea ožžon eanemus ovdajienaid

Ohcejogas ovdajienasteamis eanemus jienaid lea ožžon Guovddášbellodat 28,3 proseantta go jienain lea lohkkon sullii 70 proseantta.

Nubbin eanemus jienaid lea ožžon Olgešbellodat Kokoomus 18,4 proseantta ja goalmmádin SDB 15 proseantta.

Eará bellodagat: Gurutlihttu 10,3 proseantta, Vuođđosuopmelaččat 9,4 proseantta, Kristtalašdemokráhtat 8,8 proseantta ja RÁB 8,1 proseantta.

Dán rádjái eanemus ovdajienaid lea čoaggán Ruoŧŧelaš Álbmotbellodaga evttohas Vesa Länsman 45 jiena. Nubbin eanemus ovdajienaid lea čoaggán Kristtalašdemokráhtaid Väinö Guttorm 33 jiena ja goalmmádin Gurutlihtu Anni Ahlakorpi 29 jiena.

13.6. dii. 18.45 Ovdajienaid lohket jo

Válgalanjaid uvssat mannet gitta dii. 20. Dál leat lohkamin jo ovdajienaid ja daid bohtosiid muitalit sullii dii. 20.

Evttohasaid oaiviliidda sáhttá oahpásmuvvat Yle válgafálaldagaid bokte

Gielddaválgaevttohasaid oaiviliidda sáhtát oahpásmuvvat Yle válgamašiinna bokte. Válgamašiidna lea fállun suomagillii, ruoŧagillii, eaŋgalsgillii, ruoššagillii ja davvisámegillii. Davvisámegielat gažaldagat leat fállun sámeguovllu gielddain Anáris, Eanodagas, Ohcejogas ja Soađegilis, ja dasa lassin Suoma stuorimus gávpogiin dego Helssegis, Tamperes, Turkus, Jyväskyläs, Oulus ja Roavvenjárggas.

Kuntarundi-nammasaš válgaságastallamiid sáhttá guldalit Yle Areenas. Kuntarundis leat 294 oasi, main beassá vuodjut iešguđet gielddaid politihkalaš gažaldagaide. Juohke oasis leat golbma evttohasa ságastallamin ja ságastallama jođihit Yle guovlodoaimmaheaddjit.

Yle Sápmi lea buvttadan ságastallamiid sámegielddain ja Ohcejoga gieldda oasil ságastallan lea ordnejuvvon sihke davvisáme- ja suomagillii.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat

Muualla Yle.fi:ssä