Yle Sápmi ohcá anáraš-, davvisáme- ja nuortalašgielat ođđa bargiid hárjehallanprográmmii.

Prográmma juohkása guovtte oassái: hárjehallan álgá miessemánu álggus moatte vahku intensiivakurssain journalismma birra ja dan maŋŋá lea geasi guhkkosaš hárjehallan Yle Sámi doaimmahusas. Nu gohčoduvvon traineeprográmmas máksojuvvo Yle bargoeaktosoahpamuša mieldásaš hárjehallanbálká.

Hárjehallamis beassá oahpahallat geavadis nu rádio, neahttaságaid go maiddái tv:a doaimmaheami. Ovddit vásáhus journalismmas ii gáibiduvvo.

– Traineeprográmma heive bures ovdamearkan allaskuvlastuđeanttaide. Juos leat Oulu universitehta stuđeanta, oaččot traineeprográmmas maiddái oahppočuoggáid. Nuppe dáfus prográmma sáhttá leat molssaeaktu maiddái logahaga maŋŋá, go vel smiehtadat čuovvovaš lávkki, muitala Yle Sámi hoavda Maiju Saijets.

Ohcanáigi prográmmii lea dál álgán ja dat bistá 5.4. rádjai. Hárjehallamii válljejuvvojit 5–6 olbmo.

Lassedieđuid hárjehallanprográmmas ja ohcamis sáhtát lohkat dáppe.