Sápmi |

Yle Sápmi sirdása gulul geasseáigái – radios gullat geasi áigge earret eará geassegussiid

Boahtte vahkus Yle Sámi radios bohtet fápmui geassesáddenáiggit ja Yle Sámi iđit báhcá geasseboddui. Min tv-ođđasat, Yle Ođđasat, leat oaidnimis vel maŋimuš vahku ovdal geassebottu, mii álgá mihcamáraid maŋŋá.

Geasseguossi
Dán gease Geasseguossi-ráiddus guossin leat earret eará Titta Rasmus, Jukka Mettovaara ja Rauni Mannermaa. Govva: Kirsti Länsman / Yle, Veikka Ritola / Yle, Sáárákáisa Seurujärvi / Yle, govvagiehtadallan Linda Tammela / Yle

Yle Sámi radios geasseáigi álgá boahtte vuossárgga 21.6. Radiosáddagiid oasil geasseáigái sirdašuvvan oaivvilda, ahte radios iđitsátta Buorre iđit Sápmi álgá gávcci áigge ja bistá logi rájai ja Yle Sámi iđit -sátta báhcá eret.

Iđitsáddagiin fállat áigeguovdilis ságaid, ja lunddolaččat maid geasseságaid.

Logis beal ovttanuppelogi rádjai gullat juohke árgabeaivvi vel min rádioarkiivva bearraliid. Vuossárgga vuorus lea Rohkos, maŋŋebárgga arkiivaprográmma anárašgielat Ellee arkkadat, gaskavahku nuortalaš gielat Jielli arkiiv, duorastaga davvisámegielat Ealli arkiiva ja bearjadaga vel mánáidprográmma Binna Bánna. Dát sáttaoasit sáddejuvvojit logis beal ovttanuppelogi rádjai.

Veaigin min radiosátta Dearvva! Tiõrv! Tiervâ! álgá golmma áiggi ja bistá viđa rádjai. Sisdoallun fállat áigeguovdilis ságaid ja radioođđasiid. Radioođđasat leat juohke árgabeaivvi beal njealji ja beal viđa áigge.

Sámi Radio
Tabeallas oainnát, galle áigge ja mii beivviid miige prográmmaid sáddejuvvo Yle Sámi radios mihcamáraid maŋŋá. Ovdal mihcamáraid prográmmat sáddejuvvojit muđui seamma tabealla mielde, earret Geasseguossi. Govva: Maiju Saijets / Yle

Yle Ođđasat geasseboddui mihcamáraid manná

Sámegielat tv-ođđasat, Yle Ođđasat, leat vel oaidnimis boahtte vahku 24. beaivvi rádjai juohke beaivvi diibmu 16.45 Yle TV1:žis.

Mihcamáraid maŋŋá, vuossárgga 28. beaivvi, mis álgá sámegielat tv-ođđasiid oasil geasseboddu, ja sáddagat joatkašuvvet fas borgemánu 23. beaivvi.

Davviriikkalaš tv-ođđasat, Ođđasat, báhcet geasseboddui juo boahtte vuossárgga. Otne bearjadaga lea maŋimuš guhkes sátta diibmu 22.50 Yle TV1:žis.

Geasseáiggi fálaldahkan Geasseguossi

Geasseáiggis Yle Sámi radios lea erenomáš prográmmafálaldat, man namma lea Geasseguossi. Diibmobeallásaš prográmmas ságastallat miellagiddevaš olbmuiguin iešguđetlágan fáttain. Vuosttaš prográmma lea gullamis vuossárgga 28.6.

Geassegussiin beassat deaivvadit juohke vuossárgga ja bearjadaga diibmu 16.33–17.00, nappo Geasseguossi-rádioprográmma sáddejuvvo dalán rádioođđasiid maŋŋá dieid beivviin.

Vuosttaš geasseguossi lea Leena Saijets Njellimis dalán mihcamáraid maŋŋá. Doaimmaheaddjin lea Anja Kaarret. Nubbin guossin fas lea Inker-Anni Valkeapää ja doaimmaheaddjin dásges lea Marianne Ketola.

Dán geasi áigge Geasseguossi-prográmmain leat mielde maiddái earret eará Jukka Mettovaara, Rauni Mannermaa, Titta Rasmus, Heini Wesslin ja Bikka Veijola.

Lunddolaččat radioságaid beassá guldalit maid Yle Areena bokte. Ovdamearkan buot Geasseguossi-oasit leat guldaleamis maid nu gohčoduvvon podcastan doppe. Muitalat min geassegussiin maid neahttasiidduin.

Dárkileabbot min prográmmadieđuid go maid ođđasiid ja eará ságaid beassá oaidnit maid min neahttasiidduin čujuhusas yle.fi/sapmi.

Varrasamosat: Sápmi

Váldoođđasat

Varrasamosat

Muualla Yle.fi:ssä