Lapin Liha doaimmajođiheaddji Jukka Kristo lea almmuhan ruoššalaš bierggu buktima sivvan dan, go Suoma bohccot eai šat oktageardánit reahkká - jahkásaš buvttadeapmi lea gahččan 20 000 bohccuin.
Bálgosiid ovttastusa ságadoalli Jukka Knuuti mielde ruoššalaš bierggu vuovdin ii leat áittan suopmelaš bohccobierggu vuovdimii. Knuuti giitá Jukka Kristo rehalaš dieđiheamis, danin go biergguoastiin lea vuoigatvuohta diehtit bierggu álgovuolgaga. Knuuti jáhkká suopmelaččaid oastit Suoma beale bierggu dás duohkoge, muhto dál váilli lea leamaš bággu deavdit ruoššalaš biergguin.
Knuuti muitala maiddái, ahte Ruoššas bukton bierggu kvalitehta deavdá sihkkarit EU gáibádusaid. Bohccuid njuvvet Yar-Sale gávpogis, gosa suopmelaš Kometos Oy lea huksen gáibádusaid deavdi njuovahaga. Sámi oahpahusguovddáš lea skuvlen bargiid njuovvat bohccuid suopmelaš hygieniijanjuolggadusaid mielde.
Almmolaš ságastallamis badjealbmáid leat sivahallan beađuid lobihis goddimis ja das, ahte go bohccot leat menddo olu, jeageleatnamat gollet. Bohccobierggu buvttadeapmi lea goittotge geahppánan spirevahágiid dihte nu sakka, ahte bierggu ferte buktit gitta Sibirjjás. Ruossalasvuohta lea čielggas - Bálgosiid ovttastusa ságadoalli Jukka Knuuti mielde gažaldat lea doaladumiin.
- Oaidnu jeagel- ja guohtuneatnamiid gollama eastimis boazologuid vuolidemiin lea dieđusge birasekologalaš, muhto imaštalan, geat jeahkáliid suodjaleamis dalle loahpa loahpas ávkašuvvet. Eai aŋkke badjealbmát, jus boazologuid ferte vuolidit. Gii loahpa loahpas oba sáhttá dadjat, buorránitgo jeageleatnamat boazologuid vuolideamis, imaštallá Knuuti.
Lapin Liha lea plánen buktit 200 000-250 000 kilo bohccobierggu Sibirjjá Jamal guovllus.
YLE Sápmi/ Ailu Valle
