Spireforuma čohkken lea guovddášbellodaga riikkabeaiáirras Janne Seurujärvi álgga, man riikkabeaivvit gieđahalle ja dohkkehedje ovdal geassebottu.
Seurujärvi muitala, ahte vuosttas spireforum livčče vuosttas lávki bissevaš spireáššiid ráđđádallangotti vuođđudeapmái davás.
Seurujärvi mielde foruma dehalamos ságastallanfáttát leat vuosttažettiin heivvolaš spirenáliid meriin mearrideapmi nu, ahte das váldojuvvošedje vuhtii boazodoalu dárbbut ja goittotge maiddái spirenáliid biologalaš mearkkašupmi.
Árvalusaid mielde spiret godde diibmá 20 000 bohcco, mii lea measta 10 proseantta oamastuvvon bohccuid olles mearis. Virggálaččat spiriid goddin bohccuide rehkenastojuvvojit dušše gávdnon bohccot, mat ledje diibmá 3 377. Danin Seurujärvi lokte nubbin dehalaš fáddán dáláš spirevahágiid rehkenastinvugiid ođasmahttima dan eahpedárkilisvuođa dihte.
Goalmmát dehalaš ságastallanfáddán Janne Seurujärvi namuha spirebuhtadusaid máksima jođálmahttima, daningo dálážis buhtadusaid máksin lea vearrámus dáhpáhusain maŋŋonan juoba 1,5 jagi. Seurujärvi lasiha, ahte go ođđa spiremeriin ságastallat ja vejolaččat mearridit, maŋŋelis maiddái buhtadusaid máksima galgá meroštallat ođđasit.
Seurujärvi mielas stáhta ja eiseválddit galggašedje maid váldit ovddasvástádusa spiremeriid ráddjemis, eaige vuodjut dušše gohcimii ja meahcástanrihkkosiid čielggadeapmái.
Plánaid mielde forumii boađášedje ovddasteaddjit aŋkke eana- ja meahccedoalloministeriijas, Lappi ELY-guovddážis, Bálgosiid ovttastusas, RKTL:s, Lappi fuođđodikšunbires ja maiddái bolesis ja rádjegozáhuslágádusas. Listu dievasmahttojuvvo ain dárbbu mielde, lohká Seurujärvi.
YLE Sápmi/ Ailu Valle
