Lappi fuođđohoavda Teuvo Eskola lohká, ahte dábálaččat eai láve bivddu álggus goddit ná olu guovžžaid, daningo beatnagat leat vel geasseortnegis ja lastamuorat váikkuhit guovžžaid áicamii.
Eskola mielde fárttain ovdánan bivdu muitala erenomáš nana guovžanális. Guovžabivdi Risto Turunen Anár Keväjärvis lea seamma oaivilis Eskolain.
- Gal dáppe lea nu olu guovžžat, eandalit Anárjávrri birrasis. Muhto in jáhke, ahte guovžabivdit illudit lassánan nális, dasgo beahtu lea beahtu. Galhan dan oaidná, go ealuinge leat miesit jávkan, Turunen lohká.
Boazodoalloguovllu nuortaosiin lea lohpi bivdit 45 ja oarjeosiin 15 guovžža dán čavčča. Nuortaoasi lohpemeari leat bajidan mannan jagis logiin lobiin ja oarjeoasi golmmain lobiin.
Guovžabivdu joatkašuvvá gitta golggotmánu lohppii, jus lohpemeari ii dieva dán ovdal.
