Ijahis Idja -musihkkafestivál vuolgá odne bearjadaga johtui Anáris nuoraid konsearttain. Festiválajođiheaddji Anna Näkkäläjärvi muitala, ahte dán jagaš nuoraid beaivái leat boahtimen mánát ja nuorat eanet go goassige ovdal. Konseartta lassin nuoraide leat ordnejuvvon maiddái musihkkabájit, muitala Näkkäläjärvi.
Mánáid ja nuoraid konsearta álgá diibmu 13 Sámi oahpahusguovddáža šiljus. Konsearta lea nuvttá.
Dán jagaš váldokonsearttas lávvardat eahkeda leat mielde beakkán Sámi artisttat, dego earret eará Ádjagas, Mollet, Amoc ja Angelit. Lávddis gullo maiddái árbevirolaš luohti ja leudd, ja eahkeda áigge lea vejolaš oaidnit olu ođđa artisttaid čájeheame čehppodagaset. Anáris goit varra eanemus vurdojuvvon lea Angelit, ovddeš Áŋŋel nieiddat, jáhkká Näkkäläjärvi.
