Raporttas čuožžu, ahte oasis guovllu čáziin lei nu olu alumiidna, ahte dábálaččat bealli girjeluosain jámášedje ná alla árvvuide. Alumiinna duođalaš váikkuhusain guollenáliide ii goittot leat sihkkaris diehtu, dasgo dutkit eai dieđe makkár alumiinnas lea jearaldat.
Mášengolleroggan lea goittot čielgasit váikkuhan Miessejoga ja Jeagelávžži dápmotnállái, dasgo muhtun čáziin váilojedje ollásit dápmotveajehat.
Váttisvuođaid dagaha maid dat, go guovllus johtet olu vánddardeaddjit, geat váldet jogas geavahančázi. Čáziid alumiidna- ja ruovdeárvvut mannet čielgasit dálločáhcái meroštallojuvvon árvvuid badjel, muitala čáhcebiologa Petri Liljaniemi.
- Iihan duolva čázi mielas geahča ja juga, iige gánnetge juhkat jus orru hui moivvas, Liljaniemi lohká.
Lappi Ely-guovddáš lea ohcamin ruhtadeami vuoi beasašii dutkat mášenroggama birasváikkuhusaid eanet boahtte gease. Čáhcebiologa Petri Liljaniemi muitala, ahte ulbmilin livččii váldit guovllu čáziin čájánasaid moddii mánotbajis.
- Ná oaččošeimmet sihkkarut dieđuid ja beasašeimmet plánegoahtit vejolaš suodjalandoaimmaid, Liljaniemi muitala.
Ođđa ruvkeláhka loahpaha mášenroggama Leammi álbmotmeahcis sirdásanáiggi maŋŋá. Riikkabeaivvit leat guottihan gávcci jagi sirdásanáiggi.
