Kostamukses Urho Kekkonen on tundiettu ristikanzu, sendäh gu kolmekymmen vuottu tagaperin Suomen pitkyaigazin prezidentu oli pannuh alguh linnan srojimizen keskel korbie.
Kekkonen sobi täs dielos sillozen Nevvostoliiton piäministran Aleksei Kosiginanke. Linnan da raudumalmii jalostajan suuren tevolližuskombinuatan suomelazet da ven’alazet srojittih yhtes, da monien vuozien aigua projektu andoi ruaduo tuhanzile suomelazile.
Karjalan tazavallan piämiehen Aleksandr Hudilazen mugah Karjalas Kekkostu ei olla unohtettu.
– Karjalassa ei ole yhtäkään ihmistä, ei lasta, ukkoa tai mummoa, joka ei tietäisi, kuka oli Kekkonen (Karjalas ei ole ni yhty mostu ristikanzua, ni lastu, ni died’oidu, ni buabua, kudai ei tiedäs, ken oli Kekkonen), sanou Hudilainen suomekse.
– Kekkostu tietäh, da hänes on jiännyh ylen hyvä musto.
Jalustehen rahoitus oli kiven al
Unohtua Kekkostu ei anna vie Kekkozen da Kosiginan mustopačas, kudai avattih Kostamuksen kul’tuurutaloin evustal vajuat kolme vuottu tagaperin. Pačas kuvuau kahtu kannon n’okas istujua valdivojohtajua, kuduat kartu käis planiiruijah uuttu Kostamuksen linnua.
Paččahas maksoi Ven’a, ga graniittujalustehes maksettih suomelazet. Dengua andanuzien nimet on pandu pliittah, kudai avattih pruazniekallizesti piätteniččän 22.7.2016.
Pliittah on pandu kaikkiedah 16 lahjoittajan nimie, ga joukos on vaigu kaksi Kekkozen aijan päivännouzupuolen kauppua pidänytty yritysty. Kekkozen perindyö huolijan UKK-Seuran kunnivo-ozanottajan Seppo Sarlundan mugah viesti on selgei.
– Se sanou ičensuvaičukses.
”Täs on Urho Kekkonen muannuh”
Pliitan avavuspruazniekku oli vuitti UKK-Seuran kezäajeluu, kuduas autobuussu perindöseuran ozanottajienke ajoi Kostamukses Kekkozen jallanjälgii myöte kui ajellah vai palomniekat.
Programmah kuului ezimerkikse kävyndy mustah kylyh, kuduas kylbiettihes Kekkonen da Kosigin. Sit samazes pihas löydyi Kekkozen mökkipaikkugi.
– Täs on meijän tazavallan piämiehen magavosija. Täs on Urho Kekkonen muannuh, sanou sih kohtah ennegi käynnyh Kajuanin linnanvaldujoukon paginanvedäi Vesa Kaikkonen da ozuttau mökin magavopertii.
Prezidentua Niinistyö kiitetäh
Kekkozen varzinaine jallanjälgi löydyy, konzu matkalazet piästäh tevolližuskombinuatan suuren avvonazen kaivoksen luo. Sie on hyvä duumaija Suomen nygözen ulgopoliittizen liinien ”kekkoslažuttu”.
UKK-Seuran paginanvedäjän, deputuatan Seppo Kääriäizen (kesk.) mieles Suomes nygöigi vie todevutetah Paasikiven realizmah perustujua da Kekkozen aktiivižuoh pohjavujua ulgo- da turvalližuspoliitiekkua.
– Se tovengi merkičykselline liinii on jatkunuh da jatkuu nygöigi prezidentan Niinistön johtol, kiittäy häi.
Kääriäizen mugah Kekkozen liinies ei olla liistetty. Seuran kunnivo-ozanottai Seppo Sarlund on vähästy pessimistizembi.
– On äijy mostu pyrgimysty täs liinies liistämizeh. Yhtelläh meijän prezidentu on aiga hyvin maltanuh pidiäkseh täs liinies.
Luve sežo
Kekkosta ei ole unohdettu rajan takana Karjalassa: "Ei lasta, ukkoa tai mummoa, joka ei tietäisi"