Gaskavahku Lapin Kansa -áviissas sámediggeáirras Anna Morottaja ja dutki Suvi Kivelä čáliiga, ahte iežas álbmot hilgu stuorámus dáiddáreaset ja jurddašeaddjiset, go son gullá seksuálalaš vehádahkii.
Dutki Marjut Aikio dadjá, ahte jos dainna čuoččuhusain oaivvildit Áilloháčča, de ášši ii leat ná.
- Mun lohken imaštemiin duon ártegis ja moivvas čállosa inge sáhttán ollenge áddet mas lei gažaldat. Ja masa duot čuoččuhus vuođđuduvai, Aikio dadjá.
"Sámiid gaskkas Áilu lei ráhkistuvvon"
Aikio lea čállimin Áillohačča biografiija.
- Mun lean badjel vihtta jagi vuđolaččat dutkan Nils-Aslak Valkeapää eallima ja su buvttadeami. Mus lea olu materiála ja mihkkege duon materiálas ii doarjjo dakkár čuoččuhusa, ahte sápmelaččat, Áillu iežas álbmot, livčče su hilgon. Baicce nuppe gežiid. Ferte dadjat, ahte Áilu válddii iežas saji dáiddárin ja jurddašeaddjin ja son doalai dan.
Aikio oaivvilda, ahte sápmelaččat gudnejahtte Áillohačča priváhtavuođa.
- Sámiid gaskkas Áilu lei hui ráhkistuvvon, gudnejahttojuvvon ja sámit maiddái gudnejahtte su priváhtaeallima.
- Čálliguovttos ferteba ákkastallat masa sudno čuoččuhusat vuođđuduvvet. Ii galggašii čuoččuhit dákkáriid ja loavkidit árvvusatnojuvvon dáiddára ná, Aikio oaivvilda.
"Ean oaivvildan Áillu"
Nubbi oaivilčállosa čálliin, dutki Suvi Kivelä, šiitá ahte soai Anna Morottajain livččiiga oaivvildan Áillu čállosis.
- In áddet mo Marjut Aikio lea sáhttán ášši ná dulkot, Kivelä dadjá.
Kivelä ii goittotge hálit namuhit gean soai oaivvildeaba iige hálit searvat báddejuvvon jearahallamii áššis.
- Sámi stuorámus dáiddáris ja jurddašeaddjis humadettiin olbmot jurddašit Nils-Aslak Valkeapää, nu Suomas, Ruoŧas go Norggasge, Aikio dadjá.
Dievasmahttojuvvon 14.2.2014 diibmu 11:10:
_Yle Sápmi ii fáhten Anna Morottaja ságaide duorastaga áigge. Yle Sápmi lei oktavuođas Marjut Aikioi ovdal ođđasa almmustahttima ja mii muitaleimmet sutnje maid Suvi Kivelä lei vástidan áššái. _
