Avvilis Anne Olli gievkkanbeavddi devdet liimmat, báberstuhkat, streaŋga ja máŋggat dahkuvuovttat. Ieš nu buđalda go áigu gerget duojis ovdal suoidnemánu beallemuttu.
Su astoáigge buđaldeapmi lea cosplay ja dál lea ráhkkaneamen Kuopio animecon várás.
– Mun geahčan anime ja spealan spealuid. Dasto jus dain boahtá mii nu somás figuvra ovddal, dasto mu sáhtán gekset, ahte ahaa, dien mun háliidan "cosplayet".
– Dasto mun álggán buđaldit buotlágan gággásiin ja áibmospáppain. Iskkan oažžut dan biktasis seammalágana go animes, čilge Anne dan, mas dás lea sáhka.
Ii muital makkár biktasa duddjo dán jagi animecon várás
Dáhpáhusaide ii dárbbaš juohke jagi goarrut ođđa biktasa. Anne háliida ovdánit ja hástit iežas ja dahkat áli binnáš buoret go diibmá. Dan gal ii muital, ii sátnegežiinge makkár figuvra son dán jagi lea.
– Mun in sáhte dadjat mii das boahtá go dat lea vel suollemas. In leat háliidan vel muitalit, ahte man figuvra mun lean dahkamin. Dát lea mu stuorámus prošeakta dán rádjái. Doaivumis dás boahtá fiinna. Gal mus guhká manná, ahte mun oaččun dan válmmašin. Doaivumis dát gánniha, moddjesta Olli.
Fertešii máŋga diimmu stellet ovdal sáhttá figuvran iđistit kamera ovdii
Olli beroštuvai badjedási áigge mangain, animein ja cosplays. Rájus leat visot dat biktasat maid lea gorron.
– Das lea dasto _shiina mayuri _. Dakkár Animes go Steins:Gate -animes. Dan mun lean dahkan. Dat lei mannan jagi.
Dán vuoru son ii coggan ovttage biktasa. Fertešii máŋga diimmu stellet ovdal sáhttá figuvran iđistit kamera ovdii.
– Das manná nu guhká go galgá smiŋket. Go dásge leat čáhppes čalbmeguolggat, dasa manná guhká, ahte fitne daid fiidnát. Danin in dál cokka dán ala, muitala Olli.
Máŋga hommá dan ovtta doaimma siste
Jus beroštuvvá dán astoáiggedoaimmas, de álkimusat álgui beassá neahta vehkiin. Čállá dušše googlei "cosplay" ja nu rahpasa ođđa máilbmi, rávvesta Olli.
– Máŋggas dieđusge čaibmet, ahte miibat diet lea hommáid, ahte pinkki vuovttat ja vaikko maid muhto galhan dát lea buoret go muhtun eará astoáiggebuđaldus.
– Dás leat nu olu maid sáhttá dahkat, dego máŋga hommá dan ovtta doaimma siste, čilge Olli.
Earáid deaivan deháleamos
Earenomáš biktasiid goarrun ja iežas hástin dieđusge leat geasuheaddjit, muhto deháleamos sutnje lea deaivat dáhpáhusain earáid, geat beroštit seamma áššis go son.
– Buot stuorámus lea dieđusge deaivat daid eará seammalágan olbmuid doppe dáhpáhusain.
– Cosplays deháleamos lea dat, ahte lea somá. Nubbin easkka dat, ahte makkár dan biktasis boahtá.
– Mus leat gal moadde biktasa maid lean smiehttan, ahte livčče somá daid dahkat. Eai mus dal dađi stuorát niegut dás leat. Gohan beassá dahkat, loahpaha Olli.
