Čiežas sámedikki láhttuin vástidedje, ahte meinejit álgit boahttevaš čavčča sámediggi válggaide. Sii leat Anu Avaskari, Jouko Hetta, Anne Nuorgam, Veikko Porsanger, Nilla Tapiola, Heikki Paltto ja Asko Länsman.
Veikko Porsanger muitala ahte son álgá evttohassan go dálá stivrras eai leat váldán buot sámiid vuhtii.
– Eske fitnen doalvume almmuhusa ja lean álgime. 8 jagi lean leamaš doppe. Dalá stivrras eai leat váldon buot sámit vuhtii, nu mo min johkagátteolbmuid. Dušše badjeolbmuid áššiid ovddidit doppe. Dien dihti ferten iskat vel vuolgit.
Jouko Hetta ja Anne Nuorgam kommenteriiga, ahte soai álgiba evttohassan danin go sin mielas juoidá lea báhcan gaskan. Jouko Hetta dajai ahte go ILO 169 -soahpamuš bázii gaskan nu son álgá evttohassan ja Anne Nuorgam muitalii ahte go sámesoahpamuš bázii gaskan nu son álgá evttohassan.
Njealjis vástidedje ahte eai álgge evttohassan
Njealjis vástidedje Yle Sápmái ahte eai áiggo álgit evttohassan boahtte sámediggeválggaide.
Sii leat Veikko Guttorm, Tauno Haltta, Pertti Heikkuri, Anna Morottaja.
Tauno Haltta kommenterii, ahte guokte báji ledje sutnje doarvái ja ahte nuorabut ožžot dál doarrut. Son goittotge dajai ahte jus su válljejit lávdegoddái dasa gal sáhttá álgit.
Pertti Heikkuri Avvilis oaidná ahte ođđa ámadeajuid dárbbašuvvojit sámediggái.
– Lean leamašan juo oalle guhká, 12 jagi guovtti sierra oasis. Addit nuorabuidda vejolašvuođa bargat ja ođđa ámadeajut varra dárbbašuvvojit, dajai Heikkuri.
Veikko Guttorm fas oaidná ahte son lea leamašan nohkká bájit sámedikkis.
Čiežas eai vel diehtán dahje háliidan kommenteret
Čiežas eai vel duorastaga diehtán, dahje háliidan kommenteret dan ahte meinejitgo álgit evttohassan válggaide.
Sii leat Ulla Maarit Magga, Arto Pohjanrinne, Ilmari Tapiola, Nihkolas Valkeapää, Rauni Äärelä, Pentti Valle ja Tiina Sanila-Aikio (duorastaga dilli).
Yle Sápmi ii fáhten ságáide gaskavahku beaivet Petra Magga-Vars, Yrjö Musta, Janne Näkkäläjärvi.
Sámediggeválggaid evttohasásaheapmi nohká ihttin bearjadaga, 7.borgemánu.
Rievdaduvvon 6.8.2015 dbm 14.21: Sámediggeáirras Asko Länsman attii Yle Sápmai beaivaduvvon dieđu, ahte son álgá evttohassan Sámediggeválggaide. Ikte Länsman ii lean vel sihkkar vuolgágo evttohassan.
