Sámemuseavuođđudusa stivra jotkkii gaskavahku čoahkkimasttima. Mannan vahkus stivra čoahkkanii maŋŋebárgga 18.2.2014.
Stivrra ságadoalli Nils-Henrik Valkeapää dadjá, ahte sii leat gaskavahku čoahkkimis soahpan ovttas Sámemusea intendeanttain, ahte son heaitá barggustis.
- Mii leat joatkán daid seamma áššiid giehtadallama, eai mis nu máŋga ášši lean. Mii leat ikte soahpan, ahte min intendeanta heaitá dahje su bargu nohká Siiddas ievttá beaivvi rájes. Ja mii leat soahpan, ahte mii eat dađi eanet muital, dadjá Valkeapää.
Ulbmilin hábmet doaibmi, lášmadis bargobirrrasa
Stivrras lea dál barggu vuolde maiddái Sámemusea Siidda organisašuvnaođastus, mii álggii mannan čavčča ja joatkašuvva dán jagi. Ođastusas lea sohppon čakčat.
Gaskavahku čoahkkimis stivrra ii gieđahallan dán ášši.
Stivra joatká dan guorahallama, mo organisašuvnna galggašii ovddidit njoavžilot doaibmama guvlui.
Dat lea dábálaš doaibmabidju, daningo gaskkohagaid galgá bisánit smiehttat mo bargosajiid doaibmanbirrasa sáhtašii ovddidit, muitala Valkeapää ja joatká, ahte sis lea ođasmahttinbargu álggus dál.
- Mii geahččat, ahte mo mii ođasmahttit dan organisašuvnna. Dat váldá oalle olu áiggi ja mis lea áigumuššan bargat ovttas bargiiguin ja smiehttat ođđasit, mo mii oažžut dakkár doaibmi systema, nu ahte bargiin lea njuolggo oktavuohta stivrii ja stivrras njuolggo oktavuohta bargiide. Geahččalit oažžut dán bargobáikki doaibmat lašmadit juohke ládje ja dakkár bargobáikin, gos lea somá bargat dieinna lágiin, ahte mii oažžut dán máhtu, mii olbmuin lea, de buorebut atnui, dadjá Valkeapää.
Divvojuvvon 28.2.2014 diibmu 11:19: Hálidit dárkkilmastit, ahte stivra ii heaittihan virggi baicce lea sohppon, ahte dálá intendeanta heaitá barggustis. Stivrra ságadoalli dadjá, ahte ášši ii laktás Siidda organisašuvdnaođastussii.
