Sámedikki ođđa válgabaji 2016–2019 rahpandoalut Sajosis, Anáris eai geasuhan nu olu olbmuid go lávejit.
Sámedikki dieđuid mielde báikki alde ledje sullii 100 guossi. Yle Areenas doaluid gehčče sullii 900 olbmo.
Anárlaš duojár Petteri Laiti gávnnai dasa lunddolaš čilgehusa.
– Orru ahte leat uhccán dál asttan boahtit, go Deanus lea maŋimuš beaivi golgadeamis obba dán geassái. Dat leat luosaid dieđus bivdimen ja doaivvu mielde luosaid goddetge, árvala Laiti.
Olbmot váillahedje Niinistö
Suoma Sámedikki válgabadji rahpan juohke njealját jagi ávvuduvvo álo stuorra doaluiguin.
Njeallje jagi dassái Suoma dásseválddi presideanta Sauli Niinistö lei mielde rahpamis, muhto dán háve son ii asttan boahtit.
Olbmot gal váillahedje su.
– Na galhan dan lei sáhttit finadit nugo earátge. Girdihan lea ja sushan lea suihkukone. Dat lei sáhttit finadit. Son lei geargat vel muđuige doppe ávvudit, ahte ii dat das lean gal gitta. Dat lei dieđus dat, ahte dat ii lean nu gearggus vuolgit ohpihii dáppe fitnat, oaivvilda Petteri Laiti.
Njeallje jagi dassái Anáris lei maid riekteministtar Anna-Maja Henriksson (ráb). Jagis 2008 Sámedikki rabai presideanta Tarja Halonen dilálašvuođas, mii lágiduvvui Ohcejogas.
Kansliijahoavda ovddastii stáhta
Suoma presideanta ii lean Sámedikki doaluin, daningo son lei oktanaga hupmamin suopmelaš-ugralaš álbmogiid máilmmikongreassa Lahtis Mátta-Suomas.
Su sajis ledjege sádden Anárii riekteministeriija kansliijahoavdda Asko Välimaa.
– Na maid mun dál dajašin. Doaivvu mielde mun maid dohkkejin muhtin muddui. Dieđusge leat olu eará manut dain min oaivámušaiguin. Dásseválddi presideantta lei vissa dáppe njeallje jagi dassái, nu sus lei varrá juoga eará prográmma. De fas min ministtar Jari Lindström (vs) dikšu guokte ministeriija. Susge ledje eará plánat ja nu mearridedje mu sáddet deike, Välimaa dadjá.
Livčče sávván juobe ministtara oaidnit
Helssetlaš Ida-Maria Helander lei maiddái behtton, go presideanta Niinistö ii lean boahtán rahpandoaluide.
Son livččii sávvan oaidnit Anáris juobe ministtara.
– Dáppe ii lean presideanta iige ministtarge. Gal dat mu mielas addá vehá fuones gova, ahte min doalut eai leat nu dehálaččat. Vehá dakkár ártegis dovdu bázii, Helander dadjá.
Áššis eanet duorastaga tv-ođđasiin!
