Sámedikki dievasčoahkkimis ságadoalliid sáhkavuoruin bođii ovdan, ahte dát vássán jahki leamaš váttis doaibmajahki sámediggái.
Ságadoalli Tiina Sanila-Aikio dajai čoahkkimis, ahte láhkaproseassaid olis lea boahtán dakkár dovdu, ahte Sámediggi ii leat nákcen váikkuhit nu bures go livččii galgan. Sanila-Aikio máinnašii Deanu soahpamuša ovdáneami, masa sámediggi ii leat sáhttán váikkuhit.
Nubbi várreságadoalli Tuomas Aslak Juuso dajai iežas geahčastatgas vássán jahkái, ahte ruđalaš dillige lea dahkan dan, ahte sámedikkis ii leamaš vejolašvuohta oassálastit oba bákkolaš čoahkkimiidda.
Vuosttas várreságadoalli Heikki Paltto fas, ahte ráđđádallamat Davviriikalaš sámesoahpamušas leat gárvá. Dál lea stáhtaid duohken mo jotket. Diehtu das galggašii Paltto mielde boahtit jagi álggus.
Vuosttas geardde sámedikkis leahkki áirras Pentti Pieski oaidná, ahte dát jahki lea golihan sápmelaččaid boares vuoigatvuođaid bealušteamis ja bisuheamis.
– Gal dát jahki leamaš nu erenomáš, mis lea eanaš áigi mannan bealuštit daid dálá vuoigatvuođaid. Oalle unnán leat geargan ovddidit áššiid. In lean jáhkkit dalle, ahte go vulgen sámediggái, ahte gártat dáid dálá vuoigatvuođaid nu nannosit bealuštit, dadjá Pieski.
