Vuosttas Suoma beale sápmelaš girječálli Lemehaš-Biehtár, Pedar Jalvi jápmimis dievvá 100 jagi dán jagi.
Ávvujagi gudnin Sámi Arkiiva, Sámi musea Siida ja Sámi allaskuvla leat čohkken Jalvi eallimis ja barggus johtti čájáhusa, mii rahppo Sámi álbmotbeaivve Ohcejoga girjerádjosis.
Pedar Jalvi -čájáhus johtá sámeguovllus ja Suomas olles jagi 2016. Rahpandilálašvuođas Ohcejogas Sámi allaskuvlla professor Vuokko Hirvonen muitala Jalvi eallima ja barggu birra. Dilálašvuohta álgá 6.2. diibmu 13.00.
Vuosttas Suoma sámegirječálli
Deatnogáddelaš Lemehaš-Biehtár, Pedar Jalvi (1888-1916) atnet Suoma vuosttas sámegirječállin.
Jalvi jámii nuorran, 28-jahkásažžan, geahpesdávdii ja su áidna iehčanas girjjálaš duodjin bázii dikta- ja muitalusčoakkáldat _Muohtačalmmit _(1915). Čoakkáldaga nammadikta Muohtačalmmit govvida luondometaforaid bokte sámiid čearddalaš morráneamis bohciideaddji joavkofámu.
