Yle Sápmi fáhtii City Sámit -searvvi ságadoalli Pentti Pieski Helssegis ja nuortalaččaid ovddeš ovdaolbmo Veikko Feodoroff Anáris bearjadaga ságaide.
Sihke Pieski ja Feodoroff leaba álgime evttohassan čavčča sámediggeválggaide. Feodoroff lei odne bearjadaga guođđán báhpáriid Sajosii. Dálá ovdaolmmoš Tanja Sanila ii hálit kommenteret leago son evttohassan.
Ovdal jo lea muitaluvvon, ahte sámedikki lahttu Anu Avaskari, guhte lea Anarâšah-searvvi ságadoalli, lea evttohassan. Maiddái Sámi Duodji -searvvi ságadoalli Petra Magga-Vars, dálá sámedikki stivrra lahttu Soađegili Vuohčus, lea evttohassan. Ođđa evttohassan válggain lea mielde maid Suoma boazosámit rs. ságadoalli Per Oula Juuso Eanodagas.
Näkkäläjärvi ja Rahko vuoruheaba skuvlla
Yle Sápmi lea gulaskuddan maid eará servviid ságadolliid dán áššis ja oktage dain geaid Yle Sápmi fáhtii ii leat vuolgime evttohassan čavčča sámediggeválggaide.
Nuoraidráđi ságadoalli Niila Rahko ja demáranuoraid várreságadoalli Mikkel Näkkäläjärvi vuoruheaba skuvlla.
– In leat vuolgime. Ferten vuos geargat skuvllas ovdalgo vuolggan evttohassan, muitala Niila Rahko.
– In leat vuolgime evttohassan, go leat oahput ja olu mátkkit. Buorebut sáhtán leat veahkkin go oassálasttán ságastallamii olggobealde, dadjá Näkkäläjärvi.
Suoma Sámi Nuoraid ságadoalli Ida-Maria Helanderge ii leat vuolgime evttohassan sámediggeválggaide. Son muitala ahte SSN:in lea dál doarvái bargu.
