Sámi álbmotbeaivve Suoma, Norgga ja Ruoŧa sámeradiot sáddejit oktasaš sáddaga

Suoma, Norgga ja Ruoŧa sámeradiot sáddejit oktasaš davviriikalaš radiosáddaga sámi álbmotbeaivve dán bearjadaga.

Sátta álgá logi badjel čieža iđđes ja bistá olles beaivvi diibmu čieža rádjai eahkedis. Sátta gullo buot golmma riikkas olles beaivvi.

Álbmotbeaivvi sáddagis čuovvut dáhpáhusaid miehtá Sámi ja dan lassin prográmmas leat erenoamaš radiooasit, dego Per-Josef Idivuoma Show ja Sohkaršohkka. Maid PJ Show ja Sohkaršohkka gullojit golmma riikkas.

Dasa lassin gullat maid vuorkáprográmma sámi álbmotbeaivvi doaluin jagis 1993.

– Dábálaččat juohke sámeradio sádde iežas prográmma Sámi álbmotbeaivvi. Dán jagi hálideimmet gudnejahttit dán dehalaš beaivvi albma sámi prográmmain, mii gullo oktanaga buot golmma riikkas, gos sámit orrot, muitala Yle Sámi hoavda Pirita Näkkäläjärvi.

Yle Sámis lea sámi álbmotbeaivve lassin erenoamaš fálaldat tv:s, go Andte Gaup-Juuso lea tv-ođaslohkkin Yle Ođđasiin logi badjel golbma veaigin.