Eanodatlaš badjealmmái Andte Gaup-Juuso lea mielde dán jagáš Big Brother -tv-gilvoprográmmas.
Big Brother -prográmma álggii fas sotnabeaivve, go sisa nu gohčoduvvon BB-dállui lávkejedje 17 ássi, geain golmmas leat dán jagi eret Davvi-Suomas. Gaup-Juuso lassin vuoittus gilvaleaba Jenna Mäkikyrö Badje-Durdnosis ja Jussi Kettunen Giemas.
"Hálidan nuorra olmmožin ođđa vásáhusaid"
23-jahkásaš Andte Gaup-Juuso ozai prográmmii ođđa vásáhusaid dihte.
– In álggos jurddašan ahte beasašin sisa, gohan ohcen. Bearaš gal suorganii prográmmii vuolgima, muhto olmmoš ii oaččo dákkár vejolašvuođa juohke beaivve, Gaup-Juuso muitala Lapin Kansa -aviissas.
Gaup-Juuso ii áiggo dađi eanet buktit ovdan iežas sápmelašvuođa.
– Mu mielas dát lea persovnnalaš gilvu. Mun lean sápmelaš ja boazoolmmái, muhto BB-dálus lean dušše Andte Gaup-Juuso.
Gaup-Juusos leat BB-dálus mielde maid earret eará gákti ja silbbaidgeallanávnnas. BB-Andte govvida iežas dárkilabbot prográmma neahttasiidduin.
Big Brother -gilvvu vuoiti oažžu 100 000 euro. Kamerat čuvvot ássiid ijat beaivve 12 vahku.
Prográmma oidno Sub-kanálas vuossárggas lávvardahkii diibmu 22.00, sotnabeaivve sátta álgá jo diibmu 21.00.
