Helssega Sámi álbmotbeaivvi eahketdoaluin Sápmiklubbas guossohit arbevirolaš sámi herskuid.
Dalán klubba álggus olbmot besset borrat álgobihtáid bohccobierggus, gumposiid, varramárffiid, njuokčamiid ja suovasbierggu.
– Fálaldagas leat herskot mat leat máddin hárve fidnemis. Mállásiid lágida sápmelaš badjealmmái ovttas helssetlaš meašttirgoahkaiguin, muitala lágideaddji searvvi City-Sámiid ságadoalli Pentti Pieski.
– Jurdda fállat árbevirolaš biebmuid lea boahtán min málestankurssaid oktavuođas, maid leat ordnen Helssegis, Pieski muitala.
Konsearttas Arvvas, Ylva ja Irdon
Sápmiklubbas loaiddastit Sara Marielle Gaup Beaskka luohte-americanajoavku Arvvas, Niillas Holmberga ođđa joavku Ylva ja Irdon, mii almmustahttá vuosttas skearrus álbmotbeaivve.
Arvvas doallá konseartta Helssegis vuosttas geardde.
Sápmiklubba lágiduvvo Teatteri Forumis, Helssegis, lávvardaga guovvamánu 6. beaivve 2016. Bileahtaid sáhttá oastit interneahtas.
