Čuovvovaš sámedikki válggat leat boahtte čavčča.
Sámedikki válgalávdegoddi dieđihii maŋŋebárgga, ahte dat lea ráhkadan jagi 2015 sámediggeválggaid várás válgalogahallama.
Ohccit sullii 800 ja 483 sis dohkkehuvvojedje
Jagi 2015 nannejuvvon válgalogahallamis leat jietnavuoigadahtton olbmot oktiibuot 5 795 olbmo.
– Oktiibuot ohccit ledje sullii 800. Jagi 2014 bealde bohte sullii 650 ohcamuša, muhto ohcamušat bohte dan lassin vel jagi 2015 bealde, muitala válgalávdegotti ságadoalli Janne Näkkäläjärvi.
Virggálaš ohcanáigi nogai 31.12.2014.
Ođđa jietnavuoigadahtton olbmot merkejuvvojedje 483, geain 295 leat jagi 2011 válgalogahallamis leamašan olbmuid jienastanvuoigatvuođaahkái boahtán mánát.
– Merkekeahttá válgalogahallamii guđđojedje dat, geaid válgalávdegoddi ii geahččan deavdit sámediggelága 3 §:a eavttuid boahtit merkejuvvot válgalogahallamii ja/dahje geaid ohcamušat báhce váilevažžan, válgalávdegoddi dieđiha.
Jagis 2011 válgalávdegotti dohkkehii 330 ođđa olbmo válgalogahallamii ja lassin alimus hálddahusriekti njeallje olbmo.
Váidináigi cuoŋománu 10. beaivve rádjai
Válgalávdegoddi sádde poastta fáro juohke jietnavuoigadahtton olbmui almmuhusa jienastanvuoigatvuođas. Maiddái daid olbmuide, geat eai merkejuvvon válgalogahallamii, sáddejuvvo almmuhus das.
Válgalávdegoddi ásaha válgalogahallama oaidninláhkai 16.3.–27.3.2015 (10 árgabeaivve) sámiid ruovttuguovllus Heahtás, Anáris, Ohcejogas ja Vuohčus.
Guhte geahččá, ahte son lea vuoiggaheamet guđđojuvvon eret válgalogahallamis dahje sutnje guoski merkejupmi válgalogahallamis lea boastut, sáhttá čálalaččat gáibidit njulgema válgalávdegottis maŋimuštá cuoŋománu 10. beaivve ovdal diibmu 16.00.
Válgalogahallama vuođđun leamašan jagi 2011 válgalogahallan, man dieđut leat beaividuvvon álbmotregistaras.
Čuovvovaš sámedikki válggat leat 7.9.–4.10.2015 gaskasaš áigge.
Divvojuvvon 3.3.2015 diibmu 17:30: Ohccit ledje oktiibuot 800, eai dušše 650, dego ovdal muitaleimmet. Jagi 2014 bealde bohte sullii 650 ohcamuša, muhto ohcamušat bohte maid jagi 2015 bealde, vaikke ohcanáigi nogai 31.12.2014.
