Sámedikki stivra čoahkkana sotnabeaivve guovtti beaivve čoahkkimii.
Oktan áššin áššelisttus leat sámedikki stivrii dahkkon njulgengáibádusat válgalávdegotti mearrádusain.
Oktiibuot stivra galgá čoavdit 200 njulgengáibádusa guovtti beaivve áigge. Gažaldagas leat njulgengáibádusat, mat gusket ohcciid váldima sámedikki válgalogahallamii.
Suollemas dieđut
Stivrra lahtut ožžot njulgengáibádusaid čoavdinevttohusaid alcceseaset easka čoahkkimis.
– Váidagat sisttisdollet suollemas dieđuid, maid gieđahallan gáibida várrugasvuođa, ja danin čoavddusevttohusat eai doaimmahuvvo stivrra lahtuide ovddalgihtii, baicce čoavddusevttohusat oktan mildosiiguin juhkkojuvvojit čoahkkima oasseváldiide easkka čoahkkinbáikkis, áššelisttus muitaluvvo.
Stivrra mearrádusain sáhttá vel váidit alimus hálddahusriektái.
Áššelisttus burginohcamušat
Áššelisttus lea maid evttohus das, ahte stivra galgá mearridit dahketgo sii alimus hálddahusriektái burginohcamušaid jagis 2011 dahkkon mearrádusain válgalogahallamii váldimis.
Gažaldagas leat logi ohcci, geaid sámedikki stivra dohkkehii jagis 2011 válgalogahallamii.
Stivrras leat ođđa dieđut, maid vuođul suokkardallet, galggašii njeallje jagi boares mearrádusaide ohcat burgima.
– Jagi 2015 váidagiid gieđahallama oktavuođas lea boahtán ovdan ruossalas diehtu, go veardida ohcciid jagis 2011 almmuhan dieđuide earet eará ohcciid ádjá dahje áhku eatnigiela oahppama ektui., áššelisttus muitaluvvo.
Sámediggi lea árvvoštallan gáibidit burgit ohcamušaid
Sámedikki ságadoalli Tiina Sanila Aikio muitala, ahte stivra dohkkehii ohcciid dohkkehedje válgalogahallamii njulgen gáibádusaid mannjel.
– Logi olbmo ohcaledje jagi 2011 válggain sámedikki válgalogahallamii ja dalle válgalávdegotti hilggui ohcciid, muhto ohccit barge njulgengáibádusaid sámedikki stivrii. Sámedikki stivra dohkkehii miessemánus 2011 dáid ohcciid válgalogahallamii, muitala Sanila-Aikio.
Sámedikki dihtui leat boahtán ođđa, ohcciid vuođustusaide guoski dieđut ja lea vejolaš, ahte ohcamušat leat čovdojuvvon váilevaš dieđuid vuođul.
– Sámedikki dihtui lea boahtán dál ođđa diehtu, mii guoská ohcciid almmuhan ohcamušaid vuođustusaide ja lea vejolaš, ahte ohcamušat leat čovdojuvvon váilevaš dieđuid vuođul. Danin, go sámedigkk bargun lea dikšut sápmelaččaid iežas giela ja kultuvrra ja maiddai sajádaga álgoálbmogiin guoski áššiin, nu dat válgalogahallamii dohkkeheami mearkkašupmi lea sápmelaččaid kulturiešstivrejumi dáfus nu stuoris, ahte sámediggi lea árvvoštallan gáibidit burgimiid, muitala sámedikki ságadoalli Sanila-Aikio.
Sámedikki válggat leat 7.9.–4.10.2015.
