Mečästäjien liitto tariččou mečästäjile juristan abuu, gu vai kannanhoijollizis hukankuadoluvis roinnou žualobua tuliel mečästysaijal.
Mulloi talvel kaikis annettulois luvis žualuittihes hallindo-oigevuoh da vuitti luvis jäi sendäh käyttämättäh.
– Tämä on se viga, mindäh taričemmo zakonallistu abuu. Luvanhaldivoiččii on mečästyksen da riistudieloloin azientundii, ga ei vältämättäh zakonanspecialistu. Tariččemal zakonallistu abuu tahtommo varmistua, gu mečästäjien oigevusturvu todevuu, sanou Mečästäjien liiton toimindanjohtai Panu Hiidenmies.
Päivännouzu-Suomes hallindo-oigevus silloi hylgäi poikkevusluvis annetut žualobat.
Hukkulubien pakičusaigu lopeh
Tulien talven kannanhoijollizeh hukkumečästykseh ehoitetah vaigu 39 kuadolubua. Hukkulubien pakičusaigu lopeh ezmässargen.
Lopullizet luvat andau jo Suomen riistukeskus pakičuksih pohjavujen.
– Minun tiedämäl lubua ollah pakittu. Ga puaksuh niidy kyzytäh ihan jälgimäzel hetkel. Olemmo juohatannuh lubien pakičendan tärgevyös, tovendau Hiidenmies.
Mennyt talvel annettih 24 hukan kuadolubua. Kuattih kaikkiedah 17 hukkua. Silloi hukkii mečästettih lubien perustehel pitkän väliaijan jälles, sendäh gu hukkukandu oli jälgimäi kazvanuh pädevän suurekse.
Luve sežo
Metsästäjäliitto tarjoaa lakiapua, jos susiluvista tulee valituksia