Suopmelaš alpinčierastalli Tanja Poutiainen ávvudii mannan sotnabeaivve čierastankarrieras gávttelágan biktasis. Poutiainena bivttas lea kritiserejuvvon sotnabeaivve rájes nu sosiála medias go eará mediain.
Poutiainena áššiid fuolaheaddji ja Ski Sport Finland -stivrra ságajođiheaddji Martti Uusitalo mielas jurdda bivttasváljjemii bođii Poutiainenis.
- Oktage eará go Tanja ii válljen dan biktasa, dadjá Uusitalo ja joatká, ahte son ii sáhtte diehtit doaivvuigo Tanja Poutiainen, ahte dat loavkkidivččii gean nu.
"Poutiainen lea addán Supmii ja Lappii ollu"
Uusitalo mielas ii leat govddolaš cuiggodit Poutiainena bivttasváljjemis.
- Son lea goitge18 jagi dahkan karriera ja addán Supmii ja Lappii ollu. Jáhkán ahte ii leat govttolaš su das cuiggodit, jus dakkár feaila lea dáhpáhuvvan, maid son ii leat oaivvildan, dadjá Uusitalo.
Uusitalo mielas Poutiainena galgá suovvat dál ávvudit.
- Su galgá diktit dál ávvudit. Sihkkarit son lea dušše buori oaivvildan ja jus dat leage geavvan su vuostá dahje lappilaččaid dahje sámeduogáža vuostá, son sihkkarit dan ášši šálloša. Muhto in jáhke, ahte son áigu dan kommenteret, cealká Uusitalo.
Uusitalo dieđuid mielde čierastalli Tanja Poutiainen ii leat sápmelaš.
