Niiralan rajanylityspaikas Pohjas-Karjalan Tohmajärvelpäi roih matkua Sordavalah vaigu 60 kilometrii.
Paikallizes varaozalaukas da kohendusmasterskois nägyy samua: suomelastu kävyy endisty enämbi, da markinoičendu ielleh suunnatah juuri heile.
Huovis rub’lu on suurendannuh suomelazien da vähendännyh ven’alazien rajanylittäjien miärän.
Puaksuh sanotah, gu Ven’al benzua da rengahii ostajat suomelazet ollah buitegu muanpettäjät. Kui hyö voijah viijä omat jevrot Ven'ale? Gu vai nämmägi jevrot jiädäs kodimuah, se andas ruaduo paikallizile yrittäjile.
Pohjas-Karjala čomendelehes enzimäzil sijoil, konzu verratah muakundien välisty ruavottomusstatistiekkua. Dai mašin tiä on läs vältämättömys, sendäh gu autoubusal piäzet vaigu piämaršruttua myöte ajamah, et joga paikkah piäze. Pidänöy benzua suaja, mašin huollettua da rengahatgi uvvet – da kerran lähäl net kai voibi suaja puoleh hindäh. Tovengi muanivo on suuri.
Midä ruadazit iče sit samazes tilandehes?
Nikonzu en kuulluh nikespäi žualobua, gu ven’alazet matkuniekat tullah Suomeh dengua menettämäh. Jeuruo toinah jiäy tänne vie enämbi, migu suomelaine rajan yli viey?
Mennyt vuozinnu niken ei žualuinnuhes, gu jovensuulazis merkihuoldolois oli voinnuh nähtä ven’an registras olijua džippua.
Susiedan jevrot sit meile päijäh, ga meijän jevroloi ei suas susiedale viijä. In Finland we call this putilline dielo.
Mugaže voizimmo pidiä pahannu internettulaukkuagi. Fu, fu, fu! Jevrot mennäh muailmale, ei paikallizeh kivijalgukauppah.
Yhtelläh nenga se kauppu raja-alovehil menöy. Kentah viey, kentah suau, kentah vinguu. Konzu šemeikka, konzu suomelaine briha.
Mennyt vuozinnu käydih Torniospäi Huabarandah huovistu voidu da zuaharii ostamah. Nygöi mennäh Ikeah.
Olis päivännouzurajan tagan Ruočči, oldasgo sit rengasostoksetgi hyväksytty?
Luve sežo
Näkökulma: Renkaita Venäjältä ostavat leimataan maanpettureiksi – mitä itse tekisit?